អតីតនាយករដ្ឋមន្ត្រីម៉ាឡេស៊ីត្រូវចោទប្រកាន់ពីបទរំលោភទំនុកចិត្តពាក់ព័ន្ធនឹង1MDB
សារព័ត៌មាន Cambodia News/
ម៉ាឡេស៊ី ៖ អតីតនាយករដ្ឋមន្ត្រីម៉ាឡេស៊ី លោកណាជីប រ៉ាហ្សាក់នៅថ្ងៃពុធទី៤កក្កដានេះត្រូវបានចោទប្រកាន់ពីបទរំលោភទំនុកចិត្តពាក់ព័ន្ធនឹងរឿងអាស្រូវបាត់លុយរាប់ពាន់លាននៅមូលនិធិសាធារណៈ1MDBដែលនាំអោយលោកធ្លាក់ពីអំណាចក្នុងការបោះឆ្នោតកាលពីខែឧសភាកន្លងទៅ។
ដាទុក សេរី ណាជីប អាយុ៦៤ឆ្នាំ ត្រូវបានចាប់ខ្លួនកាលពីថ្ងៃអង្គារដោយទីភ្នាក់ងារប្រឆាំងអំពើពុករលួយម៉ាឡេស៊ីនិងបានចំណាយពេលមួយយប់នៅក្នុងកន្លែងឃុំឃាំង។ មន្ត្រីតុលាការម្នាក់បានប្រាប់សារព័ត៌មានថា អតីតមេដឹកនាំម៉ាឡេស៊ីរូបនេះនឹងត្រូវចោទប្រកាន់ពីបទល្មើសព្រហ្មទណ្ឌ។
យោងតាមសេចក្តីថ្លែងការណ៍ចេញដោយក្រុមការងារ1MDBរបស់រដ្ឋ លោកណាជីបត្រូវបាននាំខ្លួនចេញពីគេហដ្ឋានរបស់លោកនៅក្រុងកូឡាឡាំពួរនៅម៉ោង២:៣៥រសៀលថ្ងៃអង្គារ ។អតីតនាយករដ្ឋមន្ត្រីដែលបានចូលកាន់តំណែងនៅឆ្នាំ២០០៩រូបនេះ ត្រូវរំពឹងថានឹងប្រឈមការចោទប្រកាន់ជាង១០ករណីពីបទរំលោភសេចក្តីទុកចិត្តពាក់ព័ន្ធភាពមិនប្រក្រតីនៅក្រុមហ៊ុន SRC International Sdn Bhd ជាក្រុមហ៊ុនថាមពលមួយដែលជាសាខារបស់1MDB។
គេថា ក្នុងចំណោមប្រាក់រាប់ពាន់លានរីងហ្គីតដែលគេរកឃើញក្នុងគណនីរបស់លោក មាន៤២លានរីងហ្គីតត្រូវបានផ្ទេរមកពី SRC International Sdn Bhd។
ការចាប់ខ្លួនលោកណាជីបកើតឡើង៣ឆ្នាំបន្ទាប់ពីការរកឃើញប្រាក់៧០០លានដុល្លារនៅក្នុងគណនីផ្ទាល់របស់លោក ។លោកណាជីបបានបដិសេធថាមិនបានធ្វើអ្វីខុសទេ និងថាប្រាក់ដែលគេបានរកឃើញនោះជាអំណោយរបស់រាជវង់អារ៉ាប៊ីសាអូឌីត ហើយលោកក៏មិនដែលរំលោភអំណាចដើម្បីផលប្រយោជន៍ផ្ទាល់ខ្លួនដែរ៕
