ចោរឆក់២នាក់ ត្រូវជនរងគ្រោះ ដេញបំបុកម៉ូតូដួល ចាប់ប្រគល់ឲ្យសមត្ថកិច្ច
ភ្នំពេញ៖ កាលពីវេលាម៉ោង០៧និង៤០នាទីយប់ ថ្ងៃទី២៥ ខែកុម្ភៈ ចោរ ២នាក់ជិះម៉ូតូ ឆក់យកកាបូបដៃពីជនរងគ្រោះ ត្រូវជនរងគ្រោះបំបុកម៉ូតូពីក្រោយ បណ្ដាលឲ្យដួល នៅចំណុចមុខ ផ្ទះលេខ២១៤អឺសូន្យ ផ្លូវលេខ១០៧ ក្រុម៤៤ ភូមិ៨ សង្កាត់អូរឫស្សី៤ ខណ្ឌ៧មករាហើយត្រូវប្រជាពលរដ្ឋព័ទ្ធ ចាប់បាន ប្រគល់ឲ្យសមត្ថកិច្ច។
មុនពេលកើតហេតុជនរងគ្រោះ ឈ្មោះប៉េង សុខចំរើន អាយុ៣០ឆ្នាំ បើកបរម៉ូតូ ម៉ាកអាយខុន ឌុបប្រពន្ធមកពី ដើរលេងមាត់ទន្លេ ខណៈដែលមកដល់កន្លែងកើហេតុ ស្រាប់តែជនសង្ស័យទាំងពីរនាក់ បានឆក់យកកាបូប ដែលដាក់ក្នុងហោប៉ៅក្រោយ រួចបើកម៉ូតូរត់ ភ្លាមៗនោះជនរងគ្រោះបានស្រែកថា ចោរ ចោរ ហើយដេញតាមពីក្រោយ រួចបុកម៉ូតូជនសង្ស័យ បណ្ដាលឲ្យដួលទាំអស់គ្នា ទើបប្រជាពលរដ្ឋនាំគ្នាព័ទ្ធ ចាប់បានជនសង្ស័យទាំងពីរនាក់ ប្រគល់ឲ្យនគរបាលព្រហ្មទណ្ឌ៧មករា ចំណែកជនរងគ្រោះ មានរបួសជាទម្ងន់ ត្រូវបានគេដឹកយកទៅពេទ្យដើម្បីសង្គ្រោះ។
ជនដៃដល់ដែលត្រូវចាប់ខ្លួនបាន មានឈ្មោះ ងួន លាងហាក់ ភេទប្រុស អាយុ១៩ឆ្នាំ មុខរបរជាសិស្ស មានទីលំនៅផ្ទះលេខ៥៦អឺសូន្យ ផ្លូវលេខ ២៥៧ សង្កាត់បឹងសាឡាង ខណ្ឌ ទួលគោក រាជធានីភ្នំពេញ ចំណែកម្នាក់ទៀតឈ្មោះ ពេជ្រ សារិនដេវីឌ ភេទប្រុស អាយុ២១ឆ្នាំ មានមុខរបរមិនពិត ប្រាកដ មានទីលំនៅបច្ចុប្បន្នផ្ទះលេខ២១១ សង្កាត់វាលវង់ ខណ្ឌ៧មករា។
ក្រោយកើតហេតុ សមត្ថកិច្ចដកហូតបានវត្ថុតាងម៉ូតូ ម៉ាកឃ្លីកពណ៌ស គ្មានស្លាកលេខមួយគ្រឿង ប្រាក់រៀលចំនួន ៤០ម៉ឺនរៀល ប្រាក់ដុល្លារ ចំនួន ៥៥០ដុល្លារ ចំណែកជនរងគ្រោះបាត់បង់សម្ភារ ប្រាក់ដុល្លារចំនួន ១៩៥០ដុល្លារ កាត អេធីអឹម ចំនួន៣សន្លឹក ។
បច្ចុប្បន្នជនសង្ស័យទាំងពីរនាក់ និងវត្ថុតាង កំពុងត្រូវបាននគរបាលព្រហ្មទណ្ឌ ៧មករា កសាងសំណុំរឿង បញ្ជូនទៅសាលាដំបូងរាជធានីភ្នំពេញ តាមនីតិវិធីច្បាប់៕ ហេង នាង
