និស្សិតស្រីម្នាក់រងរបួសធ្ងន់ ដោយសាររថយន្តបុក
ភ្នំពេញ៖ កាលពីវេលាម៉ោង ១៧និង១៥នាទីល្ងាច ថ្ងៃទី៥ ខែមីនា និស្សិតស្រីម្នាក់ ខណៈពេលកំពុងជិះម៉ូតូ តាមបណ្ដោយផ្លូវ៧មករា កែងនឹងផ្លូវលំ ស្ថិតក្នុងភូមិអន្លង់គងចាស់ សង្កាត់ព្រៃស ខណ្ឌដង្កោ ត្រូវរថយន្តបុកពេញទំហឹង បណ្តាលឲ្យរងរបួសធ្ងន់។
និស្សិតរងគ្រោះខាងលើនេះ ឈ្មោះ ញឹម ចិន្ថា ភេទស្រី អាយុ១៨ឆ្នាំ ជានិស្សិត រស់នៅភូមិវាលថ្លាន់ សង្កាត់គងនយ ខណ្ឌ ដង្កោ ជិះម៉ូតូម៉ាក សេ១២៥ ពណ៌ខ្មៅ ស៊េរី ០១១ ពាក់ស្លាកលេខ ភ្នំពេញ 1AT-9987។ ចំណែកអ្នកបើកបររថយន្តបង្កឈ្មោះ ចេង សុធី ភេទប្រុស អាយុ៣១ឆ្នាំ មុខរបរបើករថយន្ត ស្នាក់នៅភូមិខ្វា សង្កាត់ដង្កោ ខណ្ឌដង្កោ។
មុនពេលកើតហេតុ គេសង្កេតឃើញ បុរសឈ្មោះចេង សុធី បើកបររថយន្តដឹកសិស្សសាលាអាន់ទីយ៉ូក អន្តរជាតិ តាមបណ្ដោយផ្លូវ៧មករា កែងនឹងផ្លូវលំ ក្នុងទិសដៅពីកើតទៅលិច មិនប្រយ័ត្នក៏ប៉ះគ្នាជាមួយម៉ូតូម៉ាកសេ១២៥ ដែលជារបស់ជនរងគ្រោះ យ៉ាងពេញទំហឹង បណ្ដាលឲ្យដួលសន្លប់រងរបួសធ្ងន់ធ្ងរ ត្រូវបញ្ជូនទៅសង្គ្រោះនៅមន្ទីរពេទ្យមិត្តភាព ខ្មែរ សូវៀត ភ្លាមៗ។
ក្រោយពេលកើតហេតុ រថយន្តបង្កហេតុនិងម៉ូតូរបស់ជនរងគ្រោះ ត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌដង្កោ ដើម្បីរងចាំការដោះស្រាយ៕ ហេង នាង