ក្រុមអនុរក្សឃាត់ខ្លួនយុវជន ៤នាក់ខណៈពួកគេយកថ្នាំញៀនមកឲ្យអ្នកទោសនៅគុកព្រៃស
Cambodia News
ភ្នំពេញ៖ កាលពីវេលាម៉ោង ១០ និង ៣០ នាទីព្រឹកថ្ងៃទី ១១ ខែមិនា ឆ្នាំ ២០១៣ នៅក្នុងគុកព្រៃសមណ្ឌលទី ២ សង្កាត់ព្រៃវែង ខណ្ឌដង្កោ ក្រុមអនុរក្សនៅក្នុងមណ្ឌលគុកព្រៃសបានឡោព័ទ្ធចាប់ខ្លួន សិស្សវិទ្យាល័យបានបួននាក់ក្នុងខណៈដែលក្រុមទាំងនេះបានលួចយក ថ្នាំញៀនចូលទៅឲ្យអ្នកទោសក្នុងគុកព្រៃស ។
សិស្សវិទ្យាល័យទាំងបួននាក់ខាងលើនេះសមត្ថកិច្ចនគរបាលព្រហ្មទណ្ឌ ខណ្ឌដង្កោមិនទាន់ហ៊ាន ពីអត្តសញ្ញាណពួកគេនៅឡើយទេ ដោយសមត្ថកិច្ចនិយាយហាមឃាត់ក្រុមអ្នកកាសែត ថា ទុក្ខធ្វើការសាកសួរនឹងស្រាវជ្រាវតាមចាប់មេខ្លោងរបស់ពួកគេ ដូច្នេះសូមឲ្យក្រុមអ្នកកាសែត ចាំទៅយកព័ត៌មាននៅអធិការដ្ឋាននគរបាលខណ្ឌដង្កោទៅ។
ក្រុមអនុរក្សក្នុងមណ្ឌលពីរនៃគុកព្រៃសបានឲ្យដឹងថា មុនពេលកើតហេតុជនសង្ស័យទាំងបួន នាក់បានជិះម៉ូតូពីរគ្រឿង មួយគ្រឿងម៉ាកហ្វីនណូ ពាក់ស្លាកលេខ ភ្នំពេញ ១BD៥៥០៥ នឹង មួយគ្រឿងទៀតFTR ពណ៌ខ្មៅ គ្មានស្លាកលេខ ជិះគ្នាបួននាក់ មកឈប់នៅមុខមណ្ឌលពីរ នៃគុកព្រៃស ហើយជនសង្ស័យបានសុំអ្នកយាមគុកចូលសួរសុខទុក្ខបងនៅក្នុងមណ្ឌល ពេលនេះអ្នកយាមក៏បានឲ្យពួកគេចូលទៅសួរសុខទុក្ខមិត្តភ័ក្រ ខណៈកំពុងសួរសុខទុក្ខ ក្រុមជនសង្ស័យបានបើកកាតាបលុកយកថ្នាំញៀន ប្រភេទម៉ាទឹកកក ហុចឲ្យអ្នកទោស ក៏ត្រូវសមត្ថកិច្ចនៅក្នុងមណ្ឌលឃើញទាន់ចេញអន្តរាគមន៍ឃាត់ខ្លួន ជនសង្ស័យទាំងបួន នាក់ នោះភ្លាមៗតែម្តង ។
ក្រោយពីធ្វើការឃាតខ្លួនជនសង្ស័យនេះក្រុមអនុរក្សបានទំនាក់ទំនងមក សមត្ថកិច្ចនគរបាលខណ្ឌដង្កោឲ្យចុះមកទទួលយកទៅធ្វើការសាកសួរ និងកសាងសំនុំរឿងបញ្ជូនទៅតុលា ការផ្តន្ទាទោសតាមផ្លូវច្បាប់។ បច្ចុប្បន្នជនសង្ស័យទាំងបួននេះត្រូវសមត្ថកិច្ចកំពុងឃុំខ្លួន បណ្តោះអាសន្ននៅអធិការដ្ឋាននគរបាលខណ្ឌដង្កោដើម្បីសាកសួរ និងផ្តុំសំណុំរឿងបញ្ជូនទៅ សាលាដំបូងរាជធានីភ្នំពេញចាត់ការតាមផ្លូវច្បាប់៕ ហេង នាង
