ថៃបដិសេធបង្ខិតបង្ខំបណ្ដេញពលករបរទេសចេញពីប្រទេស
សារព័ត៌មាន Cambodia News/
ថៃ (១៧ មិថុនា ២០១៤) ៖ រដ្ឋាភិបាលយោធារបស់ថៃបានបដិសេធថា ខ្លួនមិនបានបង្ខិតបង្ខំពលករបរទេសដែលមកពីប្រទេសជិតខាងឱ្យត្រឡប់ទៅស្រុកកំណើតរបស់ពួកគេ នោះឡើយ ប៉ុន្ដែការដែលពលករបរទេសចាកចេញនោះក្នុងហេតុផលផ្សេងដាច់ដោយឡែក ។
លោក Thanit Numnoi អគ្គនាយករងនាយកដ្ឋានបុគ្គលិក បានធ្វើសន្និសីទកាសែតបញ្ជាក់ថា ពលករជាច្រើនមកពីប្រទេសជិតខាងត្រូវបញ្ជូនឱ្យត្រឡប់ ទៅស្រុកកំណើតរបស់ពួកគេដោយ ហេតុផលថា ពួកគេអស់សុពលភាពនៅ ក្នុងការស្នាក់នៅ និងធ្វើការនៅក្នុងប្រទេសថៃ ។
លោក Thanit Numnoi បញ្ជាក់ថា នៅក្នុងឆ្នាំនេះ ពលករមកពីប្រទេស កម្ពុជា៦៧.៥២៩នាក់នឹងត្រូវបញ្ជូនឱ្យ ត្រឡប់ទៅស្រុកវិញ ដោយសារតែកិច្ច សន្យាជួលអស់សុពលភាព។ ចំណែក ពលករមកពីមីយ៉ាន់ម៉ា២៦៨.៥៧៩ នាក់ និងមកពីប្រទេសឡាវ៤៣.៧៣៩នាក់ក៏ត្រូវបញ្ជូនឱ្យទៅវិញផងដែរ ។
មានសេចក្ដីរាយការណ៍ថា ពលករកម្ពុជាទាំងស្របច្បាប់ និងខុសច្បាប់១០០.០០០នាក់ក្នុងប្រទេសថៃបាន ត្រឡប់មកស្រុកកំណើតវិញ ដោយសារ តែភ័យខ្លាចការចាប់ឃាត់ខ្លួន ក៏ដូចពាក្យចរចាមអារ៉ាមដែលថា រដ្ឋាភិបាលយោធាថៃមានគម្រោងបញ្ជូន ចេញពលករបរទេស ដោយស្ថានភាព សេដ្ឋកិច្ចនាពេលបច្ចុប្បន្នពុំមានការ រីកចម្រើន ៕
