មន្ត្រីទីស្ដីការគណៈរដ្ឋមន្ត្រី៖ ការស្នើសុំឲ្យដោះលែងជនជាតិរុស្ស៊ីរំលោពក្មេងស្រីខ្មែរគឺជាសិទ្ធិរបស់រាជរដ្ឋាភិបាល
លោក ផៃ ស៊ីផាន មន្ត្រីអ្នកនាំពាក្យទីស្ដីការគណៈរដ្ឋមន្ត្រីបាននិយាយថា ការសម្រេច ចិត្តរបស់រាជរដ្ឋាភិបាលក្នុងការស្នើសុំព្រះមហាក្សត្រឲ្យដោះលែងលោក អាឡិចសាន់ដ៏ ត្រូហ្វីមូហ្វ (Alexander Trofimov ទណ្ឌិតជនជាតិរូស៊ីនេះជាសិទ្ធិសម្រេចរបស់កម្ពុជា។
លោក ស៊ីផាន បានបញ្ជាក់ថា ការដោះលែងទណ្ឌិតជនជាតិរុស្ស៊ីរូបនេះ គឺមិនមែនជាការផ្លាស់ប្ដូរនឹងអ្វីមួយឡើយ ពិសេសមិនមែនជាការប្ដូរនឹងដាក់ការវិនិយោគទុនអភិវឌ្ឍន៍កោះពស់ នៅខេត្តព្រះសីហនុ នោះឡើយ។
កាលពីថ្ងៃ២៣ ធ្នូ ព្រះអង្គម្ចាស់ ស៊ីសុវត្ថិ ធម្មិកោ ទីប្រឹក្សាផ្ទាល់របស់អតីតព្រះមហាក្សត្របាន បន្ទូលប្រាប់អ្នកសារព័ត៌មានថា ការលើកលែងទោសរបស់ព្រះមហាក្សត្រសម្តេចព្រះបរមនាថ នរោត្តម សីហមុនី ដល់លោក អាឡិចសាន់ដ៏ ត្រូហ្វីមូហ្វ (Alexander Trofimov) ថៅកែជនជាតិរូស្ស៊ី បានធ្វើឡើងតាមសំណើរបស់រដ្ឋាភិបាល។
លោក អាស៊ីត្រូហ្វីមូហ្វ ត្រូវបានសមត្ថកិច្ចកម្ពុជា ចាប់ខ្លួនកាលពីឆ្នាំ២០០៧ ហើយត្រូវបានតុលាការរកឃើញថា មានទោសពីបទរំលោភក្មេងស្រីចំនួន ១៧នាក់ អាយុពី ៦ ទៅ ១៣ឆ្នាំ។ បើតាមការរាយការរបស់ rfa បានឲ្យដឹងថា មន្ត្រីអង្គការប្រឆាំងការជួញដូរ
មនុស្សបានប្រតិកម្មថា ការសម្រេចឲ្យអ្នកទោសរំលោភក្មេងរូបនោះរួចខ្លួន ធ្វើឡើងស្របទៅតាមច្បាប់មែន តែវាជាគំរូអាក្រក់។ សេចក្តីរាការណ៍បានបន្តថា លោក អាឡិចសាន់ដ៏ ត្រូហ្វីមូហ្វ រួមនឹងអ្នកទោសចំនួន ៣៦០នាក់ផ្សេងទៀត បានទទួលការលើកលែងទោសពីព្រះមហាក្សត្រ កាលពីថ្ងៃអង្គារ ទី២០ ខែធ្នូ កន្លងទៅនេះ។