អ្នកភូមិបឹងកក់លត់ជង្គង់សុំអន្តរាគមន៍ពីសម្តេចម៉ែ
Cambodia News
ភ្នំពេញ៖ នៅថ្ងៃទី១៨ មិថុនា នេះ ប្រជាពលរដ្ឋសហគមន៍បឹងកក់ បាននាំគ្នាលត់ជង្គង់ ស្រែកសុំអន្តរាគមន៍ពីសម្តេចម៉ែ នៅមុខព្រះបរម រាជវាំង ដើម្បីរកយុត្តធម៌ជូនអ្នកស្រី យ៉ោម បុប្ផា សកម្មជនតវ៉ាដីធ្លីបឹងកក់ ដែលកំពុងជាប់ឃុំឃាំង។
អ្នកស្រី យ៉ោម បុប្ផា សកម្មជនតវ៉ាដីធ្លីបឹងកក់ ត្រូវបានសាលាដំបូងរាជធានីភ្នំពេញកាត់ទោសឲ្យជាប់ ពន្ធនាគារចំនួន ៣ ឆ្នាំ និងពិន័យជាប្រាក់ ៦០ លានរៀល កាលពីខែធ្នូឆ្នាំមុនពាក់ព័ន្ធនឹងករណីបញ្ជាឲ្យមានការវាយប្រហារដោយប្រើពូថៅ និងទួរណឺវីសទៅលើអ្នករត់ម៉ូតូឌុបពីរនាក់។
ប៉ុន្តែកាលពីថ្ងៃសុក្រសប្តាហ៍មុន ចៅក្រមសាលាឧទ្ធរណ៍ បានសម្រេចរក្សាសាលក្រមនេះ ប៉ុន្តែបានព្យួរ ១ឆ្នាំនៃទោស៣ឆ្នាំនោះ។
កាលពីម្សិលមិញ កងកម្លាំងសមត្ថកិច្ចរាជធានី រាប់រយនាក់ បានធ្វើការរាំងខ្ទប់អ្នកភូមិបឹងកក់ ប្រមាណ ៥០ នាក់ មិនឲ្យដើរដង្ហែក្បួនទៅកាន់ទីស្តីការគណៈរដ្ឋមន្ត្រី ទីដែលគណៈប្រតិភូ មកពីបណ្តាប្រទេសចំនួន១២០ ដែលជាសមាជិកនៃគណៈកម្មាធិការបេតិកភណ្ឌពិភពលោកកំពុងជួបប្រជុំ ដើម្បីស្វែងរកកិច្ចអន្តរាគមន៍ឲ្យមានការជួយដោះស្រាយបញ្ហាជម្លោះ ដីធ្លីដ៏រ៉ាំរ៉ៃរបស់ពួកគេនោះឡើយ៕
