ចាប់ពីថ្ងៃទី២ ដល់ថ្ងៃ៥ សីហា ខ្យល់នឹងបោកបក់ខ្លាំងនៅតំបន់សមុទ្រ
សារព័ត៌មាន Cambodia News/
ភ្នំពេញ (០១ សីហា ២០១៦) ៖ ចាប់ពីថ្ងៃទី២ សីហា ស្អែកនេះ រហូតដល់ថ្ងៃទី៥ ខែសីហា នៅតំបន់សមុទ្រ នឹងមានខ្យល់បោកបក់ខ្លាំង ដែលត្រូវទាមទារឲ្យបងប្អូនប្រជាពលរដ្ឋ ក៏ដូចជាអ្នកទេសចរណ៍ទៅតំបន់សមុទ្រមានការប្រុងប្រយ័ត្ន។
តាមប្រតិបត្តិព្យាករណ៍អាកាសធាតុចេញផ្សាយនៅថ្ងៃនេះ ឲ្យដឹងថា ករណីនេះ គឺដោយសារតែខ្យល់មូសុងនិរតី និងជ្រលងសម្ពាធទាប បង្កើនឥទ្ធិពលមកលើព្រះរាជាណាចក្រកម្ពុជា។
ស្ថានភាពនេះ នឹងធ្វើឲ្យតំបន់សមុទ្រ នៅថ្ងៃទី១ ខែសីហា អាចនឹងមានភ្លៀងធ្លាក់តិចតួច, ចាប់ពីថ្ងៃទី២ ដល់ថ្ងៃទី៥ ខែសីហា អាចនឹងមានភ្លៀងធ្លាក់ច្រើនជោគជាំ។
ដោយឡែកតំបន់វាលទំនាប និងតំបន់ខ្ពង់រាប ថ្ងៃទី១ សីហា អាចនឹងមានភ្លៀងធ្លាក់តិចតួច, ចាប់ពីថ្ងៃទី២ ដល់ថ្ងៃទី៧ សីហា ភ្លៀងនឹងបង្កើនការធ្លាក់រាយប៉ាយក្នុងបរិមាណពីមធ្យម ទៅច្រើន៕
