ការលើកកម្ពស់ស្ត្រី គឺជាកត្តាសំខាន់
ភ្នំពេញ៖ នៅក្រៅកិច្ចពិភាក្សាតុមួយ ស្តីពីតួនាទីស្រ្តី ក្នុងការចូលរួម ក្នុងវិស័យនយោបាយនៅថ្នាក់ជាតិ នៅភោជនីយដ្ឋាន ទន្លេបាសាក់ នៅព្រឹកថ្ងៃ ទី៧ កុម្ភៈ ២០១៣ លោក អ៊ូ វីរៈ ប្រធានមជ្ឈមណ្ឌល សិទ្ធិមនុស្សកម្ពុជា (ម.ស.ម.ក) បានមានប្រសាសន៍ថា ការលើកកម្ពស់ស្ត្រី គឺជាកត្តាសំខាន់ មួយក្នុងការជំរុញ ឲ្យពួកគាត់ចូលរួម ក្នុងការបោះឆ្នោត ថ្នាក់ជាតិ និងឆាក នយោបាយ នៅប្រទេសកម្ពុជា នៅខែកក្កដា ឆ្នាំ២០១៣ នាពេលខាងមុខនេះ។
លោក និយាយថា លោកចង់ឲ្យស្ត្រីមិនមែនតែចូលរួមក្នុងការបោះឆ្នោតនោះទេ គឺលោកចង់ឲ្យស្ត្រី ចូលរួមក្នុង ឆាកនយោបាយ ព្រមទាំងក្លាយទៅ ជាអ្នកនយោបាយ និងក្លាយទៅជាអ្នកដឹកនាំ ប្រទេសជាតិថែមទៀតផង ។
លោក អ៊ូ វីរៈ បានបន្តថា ការលើកដំកើនស្ត្រី គឺជាកាតព្វកិច្ចរបស់សង្គម ជាតិរបស់យើងទាំងមូល ហើយមិនមែន តែស្ត្រីតែម្នាក់ឯងទេ គឺគួរតែមានការចូលរួមពីបុរស និងសង្គមជាតិទាំងមូល ក្នុងការ គាំទ្រស្ត្រីនៅក្នុង ឆាក នយោបាយ។
ជាមួយគ្នានេះដែរ លោកយល់ឃើញថានៅក្នុងសង្គមយើងស្ត្រីនៅមានភាពទន់ខ្សោយ និងជាជនរងគ្រោះ នៅឡើយ ហើយលោកយល់ស្របចំពោះស្ត្រីថ្នាក់ដឹកនាំមួយចំនួន ដែលពួកគាត់បានដឹកនាំជោគជ័យគ្រប់វិស័យ ប៉ុន្តែផ្ទុយទៅវិញលោកពុំយល់ស្របនោះគឺស្រ្តីមិនទាន់ជោគជ័យនៅក្នុងវិស័យនយោបាយតែម្តង។
សូមជម្រាបថា កិច្ចពិភាក្សាតុមូល ស្តីពី តួនាទីស្រ្តីក្នុងការចូលរួមក្នុងវិស័យនយោបាយ នៅថ្នាក់ជាតិ ក៏មានការចូលរួមពីបណ្តាអង្គការសង្គមស៊ីវិល អ្នកតំណាងស្រ្តី ការចូលរួមរបស់ស្ត្រី ព្រមទាំងគណបក្សនយោបាយ និងអ្នកតំណាងរាស្ត្រមួយចំនួនផងដែរ៕