អភិបាលក្រុងបាវិតជាប់សង្ស័យក្នុងការបាញ់ប្រហារកម្មករនៅរោងចក្រកៅវ៉េ
នៅថ្ងៃទី១ មីនា ២០១២ ក្រោយពិធីបើកសិក្ខាសាលាលើកទី៣ ស្ដីពីកិច្ចការពារកុមារក្នុងតំបន់អាស៊ីអាគ្នេយ៍ លោកឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ស ខេង បាននិយាយថា អភិបាលក្រុងបាវិតត្រូវសង្ស័យថា ជាជនដៃដល់ក្នុងហេតុការណ៍បាញ់ប្រហារលើកម្មករនៅរោងចក្រកៅវ៉េ (Kaoway) កាលពីជាងមួយសប្ដាហ៍មុន។
ថ្លែងប្រាប់អ្នកសារព័ត៌ បន្ទាប់ពីបញ្ចប់សិក្ខាសាលាស្តីពីការការពារកុមារនៅតំបន់អាស៊ីអាគ្នេយ៍ នៅសណ្ឋាគាអាំងទែកុងទីណង់តាល់ លោក ស ខេង បាននិយាយថា លោក ឈូក បណ្ឌិត អភិបាលក្រុងបាវិតគឺជាជនសង្ស័យក្នុងការបាញ់ ប្រហារលើកម្មការនីឲ្យរបួសបីនាក់នៅមុខរោងចក្រ កៅវ៉េ ក្នុងក្រុងបាវិត ដោយលោកបញ្ជាក់ថា «ក្រសួងមហាផ្ទៃ បានបញ្ជូនសំនុំរឿងនេះ ទៅកាន់តុលាការខេត្តស្វាយរៀងចាត់ការតាមច្បាប់រួចហើយ»។
ប៉ុន្តែសមត្ថកិច្ចនៅមិនទាន់អាចចាប់ខ្លួនជនសង្ស័យនៅឡើយ គឺត្រូវរង់ចាំនីតិវិធីពីតុលាការសិនពីព្រោះយើងត្រូវធ្វើតាមជំនាញ មួយច្បាស់លាស់ ដោយយើងមិនអាចប្រថុយប្រថានបាននោះទេ។
លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជាបាននិយាយថា តុលាការ និងអាជ្ញាធរត្រូវតែចាត់វិធានការតាមផ្លូវច្បាប់ ព្រោះនេះជាបទល្មើសជាក់ស្តែង។
គួរបញ្ជាក់ដែរថា កាលពីថ្ងៃទី២០ ខែកុម្ភៈ ទៅខ្មាន់កាំភ្លើងបានបាញ់រះជាច្រើនគ្រាប់ទៅលើហ្វូងបាតុករបណ្ដាលឲ្យកម្មការនីរបួសបីនាក់នៅមុខរោងចក្រ កៅវ៉េ ក្នុងក្រុងបាវិតខណៈដែលក្រុមកម្មករទាំងនោះបានធ្វើកូដកម្មទាមទារលក្ខខណ្ឌការងារមួយចំនួន។ បន្ទាប់ពីមានការបាញ់ប្រហារនោះអាជ្ញាធរពាក់ព័ន្ធបានសម្របសម្រួលឲ្យថៅកែរោងចក្រទទួលយកអ្វី ដែលកម្មករបានទាមទារនោះ៕
