តុលាការភូមានឹងកាត់ទោសអ្នកកាន់ពុទ្ធសាសនា៦នាក់ពីបទបានសម្លាប់អ្នកកាន់សាសនាអ៊ីស្លាម
តុលាការភូមានឹងកាត់ទោសអ្នកកាន់ ពុទ្ធសាសនា៦នាក់ ពីបទបានបង្កអោយអ្នកកាន់សាសនាអ៊ីស្លាម១០នាក់ បាត់បង់ជីវិត កាលពីខែមិថុនាឆ្នាំ២០១២ កន្លងទៅ។ នៅថ្ងៃព្រហស្បតិ៍នេះ យោងតាមអ្នកទទួលខុសត្រូវក្នុងស្រុក មួយរូប សវនាការកាត់ទោស ប្រហែលជានឹងប្រព្រឹត្តទៅ នៅថ្ងៃ២៦សីហា ខាងមុខនេះ។ គួររំលឹកថា នៅក្នុងរដ្ឋរ៉ាក់ឃីន កាលពីខែមិថុនា ឆ្នាំ២០១២ អ្នកកាន់ពុទ្ធសាសនាទាំង៦រូបនេះ រួមជាមួយអ្នកកាន់ពុទ្ធសាសនារាប់រយនាក់ទៀត នៃសហគមន៍ជនជាតិភាគតិចរ៉ាក់ឃីន បាននាំគ្នាវាយប្រហាររថយន្តក្រុងមួយគ្រឿង ដឹកអ្នកដំណើរកាន់សាសនាអ៊ីស្លាម បណ្តាលអោយស្លាប់អ្នកដំណើរ១០នាក់។
កាល ពីខែមិថុនា ឆ្នាំ២០១២ មូលហេតុដែលអ្នកកាន់ពុទ្ធសាសនារាប់រយនាក់ បាននាំគ្នាធ្វើការវាយប្រហាររថយន្តក្រុងដែលដឹកអ្នកដំណើរកាន់សាសនា អ៊ីស្លាមនោះ គឺដើម្បីស្វែងរកជនដៃដល់នានា ដែលកាលពីប៉ុន្មានថ្ងៃមុនហេតុការណ៍នេះ បានរំលោភ និងសម្លាប់យុវនារីកាន់ពុទ្ធសាសនាមួយរូប នៅរដ្ឋរ៉ាក់ឃីន។ អ្វីដែលខុសធ្ងន់នោះ គឺថាការវាយប្រហាររថយន្តក្រុងនេះ បានសម្លាប់អ្នកកាន់សាសនាអ៊ីស្លាម១០រូប ដែលមើលទៅគឺជាជនស្លូតត្រង់សុទ្ធសាធ។
បុរស៦រូប ដែលជាប់ពាក់ព័ន្ធនឹងឃាតកម្ម ត្រូវបានចាប់ខ្លួន កាលពីខែកក្កដា។ យោងតាមអ្នកទទួលខុសត្រូវក្នុងស្រុកមួយរូប ដែលសុំមិនបញ្ចេញឈ្មោះ តុលាការភូមាប្រហែលជានឹងបើកសវនាការនៅថ្ងៃទី២៦សីហាខាងមុខ នេះហើយ ដើម្បីកាត់ទោសឧក្រិដ្ឋជនជាប់សង្ស័យទាំងនេះ។
គួររំលឹកថា បន្ទាប់ពីមានហេតុការណ៍វាយប្រហាររថយន្តក្រុងនោះមក មានការផ្ទុះនូវអំពើហិង្សាជាច្រើន រវាងសហគមន៍ជនជាតិភាគតិចរ៉ាក់ឃីន និងអ្នកកាន់សាសនាអ៊ីស្លាមរ៉ូហ៊ីងយ៉ាស នៅទីក្រុងស៊ីតវេ ដែលជារដ្ឋធានីនៃរដ្ឋរ៉ាក់ឃីន។ ហើយអំពើហិង្សារវាងភាគីទាំងពីរបានផ្ទុះជាថ្មីម្តងទៀត នៅខែតុលា ឆ្នាំ២០១២។
សរុបទៅ អំពោះហិង្សាបានសម្លាប់មនុស្សជាង២០០នាក់ និងធ្វើអោយមានមនុស្ស១៤ម៉ឺននាក់ទៀតភៀសខ្លួន ភាគច្រើន គឺជាអ្នកកាន់សាសនាអ៊ីស្លាមរ៉ូហ៊ីងយ៉ាសតែម្តង។ នៅភូមា អំពើហិង្សានៅរដ្ឋរ៉ាក់ឃីនក៏បានរាលដាលដល់តំបន់ផ្សេងៗទៀត វាយប្រហារទៅលើប្រជាជនភូមាដែលកាន់សាសនាអ៊ីស្លាមផងដែរ។
ហេតុការណ៍ទាំងអស់នេះ សបង្ហាញពីការរើសអើងអ្នកកាន់ពុទ្ធសាសនា ទៅលើអ្នកកាន់សាសនាអ៊ីស្លាម ដែលមានប្រមាណជា៤ភាគរយ ក្នុងចំណោមប្រជាជនសរុប ជាង៥៤លានកន្លះ នៅភូមា។ ហើយក៏បានចោទជាសំនួរផងដែរ លើសមត្ថភាពដឹកនាំរបស់រដ្ឋាភិបាលភូមាថ្មី ដែលជារដ្ឋាភិបាលកំណែទម្រង់៕ដោយ ព្រំ សឿន សូលីណា(RFI)