កម្ពុជាធ្វើនំអន្សមយក្សទម្ងន់ ២តោនដាក់តាំងនៅមុខអង្គរ
សារព័ត៌មាន Cambodia News/
សៀមរាប (១១ មេសា ២០១៤) ៖ នំអន្សមខ្នាតយក្សមួយនឹងត្រូវបានគេធ្វើឡើងនៅក្នុងព្រឹត្តិការណ៍ អង្គរសង្ក្រាន្ត ២០១៤ ចំ ថ្ងៃបុណ្យចូលឆ្នាំថ្មីប្រពៃណីជាតិ នៅខេត្តសៀមរាប នឹងត្រូវបានគេដាក់តាំងនៅមុខច្រកចូលប្រាសាទអង្គរវត្ត ដើម្បីបង្ហាញឲ្យភ្ញៀវជាតិ និងអន្តរជាតិ ឲ្យមានភាពភ្ញាក់ផ្អើល និងបានឃើញពីនិមិត្តរូបនៃនំរបស់ប្រទេសកម្ពុជា។
លោក ចាន់ សុធា អគ្គនាយករងនៅសណ្ឋាគារវិចតូរៀអង្គរ ដែលជាអ្នកគ្រប់គ្រងដំណើរការផលិតនំនេះ បានឲ្យដឹងថា នំអន្សម ខ្នាតយក្សនោះ នឹងត្រូវផលិតឡើងតាមរបៀបនៃការធ្វើនំអន្សមធម្មតា តែសង្វាក់នៃការផលិតខុសគ្នា។
លោក ចាន់ សុធា បន្តថា នំអន្សមនោះ មានប្រវែង៥ម៉ែត្រ ទទឹង១ម៉ែត្រ និងកម្ពស់១ម៉ែត្រ ដោយការផលិតត្រូវចំណាយអង្ករអស់ ៦០០ គីឡូក្រាម សណ្តែក ១៨០គីឡូក្រាម សាច់ជ្រូក ២៥០គីឡូក្រាម និងត្រូវប្រើស្លឹកចេកអស់៣៣៣គីឡូក្រាម ព្រមទាំងគ្រឿងផ្សំជាច្រើនសិបគីឡូទៀត។
លោក សុធា ឲ្យដឹងថា នំអន្សមយក្សនេះ នឹងមានទម្ងន់រហូតដល់ទៅ ២០០០គីឡូ ស្មើ២តោន។ នំនេះ នឹងត្រូវហែទៅដាក់តាំងនៅមុខអង្គរនៅថ្ងៃទី១៣ ហើយនឹងធ្វើពិធីសម្ពោធ កាត់ឲ្យភ្ញៀវទទួលទាននៅថ្ងៃទី១៤ ក្រោមអធិបតីភាពលោកឧបនាយករដ្ឋមន្ត្រី សុខ អាន។ លោក ចាន់ សុធា បានឲ្យដឹងថា នំនេះអាចហូបបានចំនួន២៥០០០នាក់ឯណោះ៕
