លោក ហ៊ុន សែន៖ ការដោះលែងមេចលនាអាវលឿងថៃ មិនមែនជាការដោះដូរ
សារព័ត៌មាន Cambodia News/
ភ្នំពេញ (០៣ កក្កដា ២០១៤) ៖ នៅក្នុងពិធីប្រកាសជាផ្លូវការដាក់ឱ្យអនុវត្ដន៍ផែនការយុទ្ធ សាស្ដ្រជាតិ ស្ដីពីពិការភាព ២០១៤-២០១៨ និងអបអរសាទរខួបគម្រប់ ៥ ឆ្នាំ នៃច្បាប់ស្ដីពីកិច្ចការពារ និងលើកកម្ពស់សិទ្ធិជនពិការ នៅសាលមហោស្រពកោះពេជ្រ នៅថ្ងៃទី៣ ខែកក្កដា នេះ លោក នាយករដ្ឋមន្ត្រី ហ៊ុន សែន បានថ្លែងបញ្ជាក់យ៉ាងច្បាស់ថា ការដោះលែង មេចលនាអាវលឿងថៃ វីរ៉ា ស៊ុមខ្វាមឃីត មិនមែនជាការដោះដូរជាមួយពលករខ្មែរឡើយ។
លោក ហ៊ុន សែន បន្តថា ការដោះលែង វីរ៉ា ស៊ុមខ្វាមឃីត ធ្វើឡើងដោយមានព្រះរាជទាន លើក លែងទោសពី ព្រះមហាក្សត្រខ្មែរ បន្ទាប់ពីមានការស្នើ របស់លោក ប្រាយុទ្ធ ចាន់អូចា។ ហើយការដោះលែងនេះ អត់មានការសុំដោះដូរ ជាមួយពលករខ្មែរ ១៤នាក់ ដែលកំពុងឃុំ នៅខេត្តស្រះកែវ ប្រទេសថៃ នោះទេ។
ទោះបីការដោះលែង វីរ៉ា ស៊ុមខ្វាមឃីត មិនមែនជាការដោះដូរ តែលោក ហ៊ុន សែន ក៏បានស្នើសុំទៅប្រមុខរដ្ឋាភិបាលថៃ ប្រាយុទ្ធ ចាន់អូចា ឲ្យពិនិត្យទៅលើករណីនេះ ហើយគួរពិចារណា ដោះលែងពលករខ្មែរ ទាំង១៤នាក់ ដែលតម្រួតថៃ ចាប់ខ្លួន ព្រោះកាន់លិខិតឆ្លងដែនខុសច្បាប់ ធ្វើដោយមេខ្យល់នោះផងដែរ៕
