មុនផ្តើមកិច្ចប្រជុំ លោក ហ៊ុន សែន បានសាកសួរសុខទុក្ខក្រុមការងារគណបក្សសង្រ្គោះជាតិ
សាថព័ត៌មាន Cambodia News/
ភ្នំពេញ (២២ កក្កដា ២០១៤) ៖ ទោះលើសង្វៀននយោបាយបានប្រើពាក្យ ធ្ងន់ៗ និងមិនពិរោះស្តាប់ដាក់គ្នាយ៉ាងណាក្តី តែពេលជួបមុខគ្នា អ្នកនយោបាយ បានប្រើទឹកមុខញញឹមញញែមសាកសួរសុខទុក្ខ និងចាប់ដៃស្វាគមន៍គ្នាជាមួយទឹកមុខរីករាយជា ធម្មតា ហាក់គ្មានរឿងអ្វីកើតឡើងនោះឡើយ។ នៅក្នុងបន្ទប់ប្រជុំ លោកនាយករដ្ឋមន្រ្តី ហ៊ុន សែន និងជាអនុប្រធានគណបក្សប្រជាជនកម្ពុជា ដែលជាសមភាគីនៃកិច្ចចរចារឿងនយោបាយ ដ៏សំខាន់នាព្រឹកថ្ងៃទី២២ កក្កដា នេះ បានសាកសួរសុខទុក្ខក្រុមការងារគណបក្សសង្រ្គោះជាតិ ព្រមទាំងសាកសួរពីដំណើរការធ្វើចំការម្រេច ល្ហុងខ្វង និងចំការដំឡូង របស់លោក កឹម សុខា លោក សម រង្ស៊ី និង ប៉ុល ហំម ថែមទៀតផង។
ក្រុមអ្នកព័ត៌មានបានឃើញពីកាយវិការសាកសួរសុខទុក្ខរវាងអ្នកនយោបាយ ដែលធ្លាប់តែពាក់មុខយក្សលើសង្វៀននយោបាយ បានធ្វើឲ្យមានការកោតស្ញប់ស្ញែងជាខ្លាំងដល់សិល្បៈរបស់អ្នកធ្វើនយោបាយ គឺវាផ្ទុយស្រឡះពីក្រុមអ្នកបម្រើនយោ បាយ ពេលខ្លះព្រោះនិន្នាការនយោបាយបានឈ្លោះប្រកែក បង្កអំពើហិង្សា វាយតប់គ្នារងរបួសធ្ងន់ធ្ងរថែមទៀតផង ៕
