មិនទាន់មានការដោះលែង បេក្ខជន តំណាងរាស្រ្តគណបក្សសង្រ្គោះនោះទេ
សារព័ត៌មាន Cambodia News/
ខណៈគ្រាដែលថ្នាក់ដឹកនាំកំពូល នៃគណបក្ស ប្រជាជនកម្ពុជា និងគណបក្សសង្រ្គោះជាតិ កំពុងជួបប្រជុំ ពិភាក្សាតទល់មុខគ្នាស្វែងរកដំណោះស្រាយ លើវិបត្តិនយោបាយ នៅក្នុងបន្ទប់ប្រជុំនាវិមានព្រឺទ្ធសភានាព្រឹកនេះ ក្រមអ្នកសារព័ត៌មានបាននាំគ្នាជ្រួលច្របល់ជាមួយនឹងព័ត៌មានថា មានការដោះលែងបេក្ខជន តំណាងរាស្រ្តគណបក្សសង្រ្គោះ ដែលជាប់ឃុំខ្លួនបណ្តោះអាសន្ននៅពន្ធនាគារព្រៃស ។
ជាមួយនឹងព័ត៌មានលិចឮតៗគ្នាថា មានការដោះលែង បេក្ខជន តំណាងរាស្រ្តជាប់ឆ្នោត និងសកម្មជនគណបក្ស សង្រ្គោះនោះ ត្រូវបានមន្រ្តីតុលាការ និងមន្រ្តីពន្ធនាគារ បានអះអាងដូចគ្នាថា មិនទាន់មានដោះ លែងបេក្ខជនតំណាងរាស្រ្តជាប់ឆ្នោត និងសកម្មជនគណបក្សសង្រ្គោះជាតិនៅឡើយនោះទេ។
សូមបញ្ជាក់ថា បេក្ខជនតំណាងរាស្រ្តជាប់ឆ្នោតគណបក្សសង្រ្គោះជាតិ ៧រូប រួមនិងសកម្មជនគណបក្សសង្រ្គោះ ជាតិ ត្រូវបានសមត្ថកិច្ចចាប់ខ្លួន និងត្រូវបានតុលាការសម្រេចបញ្ជូនទៅឃុំខ្លួនបណ្តោះអាសន្ននៅពន្ធនាគារព្រៃស ក្រោយផ្ទុះអំពើហិង្សាធ្ងន់ធ្ងរនៅក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤ បណ្តាលឲ្យសន្តិ សុខខណ្ឌដូនពេញ ៣៩នាក់រងរបួសធ្ងន់-ស្រាល៕
