តើនាយករដ្ឋមន្រ្តីខ្មែរទាំង ៣៦រូបជានរណាមកដល់បច្ចុប្បន្ននេះ?
ក្នុងចំណោមនាយករដ្ឋមន្រ្តីទាំងនោះតើនាយករដ្ឋមន្រ្តីណាត្រូវបានគេបំពុលសម្លាប់ ចាប់ចង ចាប់ដាក់គុក បាញ់ចោល និងរត់និរទេសខ្លួន?
ដោយកញ្ញា សុវណ្ណបាថ
ភ្នំពេញ (២០ សីហា ២០១៤)៖ ក្នុងចំណោមនាយករដ្ឋមន្រ្តីខ្មែរទាំង៣៦រូប មាននាយករដ្ឋមន្រ្តីខ្លះបានស្លាប់នៅក្នុងការិយាល័យពីបទសង្ស័យថាត្រូវបានគេដាក់ថ្នាំបំពុល នាយករដ្ឋមន្រ្តីខ្លះត្រូវបានគេចាប់ចង ដាក់គុក និងបាញ់ចោល ហើយខ្លះទៀតបានរត់និរទេសខ្លួនស្លាប់ចោលឆ្អឹងនៅបរទេស ដោយសារតែនយោបាយចងអាឃាតគ្នា យកឈ្នះយកចាញ់ស្លាប់រស់ និងមិនចេះអត់ឱនឲ្យគ្នា។
បញ្ហាទាំងនេះត្រូវបានរៀបរាប់នៅក្នុងសៀវភៅថ្មីមួយដែលមានចំណងជើងថា “នាយករដ្ឋមន្រ្តីខ្មែរទាំង៣៦រូបជានរណា?” ដែលចងក្រងឡើងដោយ លោក ឆាយ សុផល អ្នកសារព័ត៌មានដែលមានបទពិសោធន៍ជាង២០ឆ្នាំមកហើយ។
ថ្លែងនៅក្នុងពិធីសម្ពោធសៀវភៅនៅឯការិយាល័យក្លឹបអ្នកកាសែតកម្ពុជានាព្រឹកថ្ងៃទី២០ សីហា នេះ អ្នកនិពន្ធ ឆាយ សុផល បានរៀបរាប់ថា សៀវភៅនេះមានគោលបំណងឲ្យមិត្តអ្នកអានបានដឹងពីប្រវត្តិសង្ខេបទាក់ទិននឹងការចាប់ផ្តើម ការចាកចេញ ការបាត់បង់ទាំងអំណាចនិងជីវិត និងការបន្តតំណែងរបស់ប្រមុខរដ្ឋាភិបាលកម្ពុជាកន្លងមក ហើយបានដឹងពីនយោបាយចាក់ស្រែះក្នុងជម្លោះផ្ទៃក្នុងផង និងឥទ្ធិពលអំណាចនិងជំនួយបរទេសផងនៅក្នុងប្រទេស ពិសេសការប្រើយុទ្ធសាស្រ្ត “ទឹកឡើងត្រីស៊ីស្រមោច ទឹកហោចស្រមោចស៊ីត្រី”។
លោក ឆាយ សុផល ដែលជាសមាជិកនាយកនៃក្លឹបអ្នកកាសែតកម្ពុជាដែរនោះបានបញ្ជាក់ថា សៀវភៅនេះបានរៀបរាប់ពីប្រវត្តិនាយករដ្ឋមន្រ្តីខ្មែរចំនួន៣៦រូបចាប់តាំងពីឆ្នាំ១៩៤៥ មកដល់បច្ចុប្បន្នហើយក៏រៀបរាប់ពីជីវិតឯកជនរបស់នាយករដ្ឋមន្រ្តីទាំង៣៦រូបដូចជា ការសិក្សា ជិវិតស្នេហា ប្រពន្ធ និងកូនចៅ ព្រមទាំងការចូលចិត្តម្ហូបនិងការលេងកីឡាជាដើម។
សៀវភៅក៏បានបញ្ចូលនូវព្រឹត្តិការណ៍នយោបាយសំខាន់ៗជាច្រើនដែលមានចាប់តាំងពីឆ្នាំ ១៩៤៥ មកដល់ថ្ងៃទី២២ កក្កដា ២០១៤ ជាថ្ងៃដែលគណបក្សសង្រ្គោះជាតិបានសម្រេចចិត្តចូលរួមក្នុងសភាជាតិជាមួយគណប្សប្រជាជនកម្ពុជា បន្ទាប់ជាប់គាំងនយោបាយអស់ជិតមួយឆ្នាំ។
លោក សម រង្ស៊ី ក៏ត្រូវបានអ្នកនិពន្ធ ឆាយ សុផល រៀបរាប់ពីប្រវត្តិជីវិតឯកជននិងការងារនយោបាយរបស់លោកដែរគិតត្រឹមថ្ងៃទី ២២ កក្កដា ដោយលោកអះអាងថា “ដោយសារតែឯកឧត្តម សម រង្ស៊ី បានជាប់ពាក់ព័ន្ធយ៉ាងជ្រៅក្នុងនយោបាយនិងបានព្យាយាមចង់ធ្វើជានាយករដ្ឋមន្រ្តីតាំងពីអាណត្តិទី២នាឆ្នាំ១៩៩៨រហូតមកដល់បច្ចុប្បន្ន ហើយលោកតែងតែមានជម្លោះជាមួយអតីនាយករដ្ឋមន្រ្តី ដូចជាសម្តេចក្រុមព្រះ នរោត្តម រណឬទ្ធិ ពិសេសជាមួយសម្តេចតេជោនាយករដ្ឋមន្រ្តី ហ៊ុន សែន នាពេលបច្ចុប្បន្នមិនចេះចប់ផងនោះ ទើបខ្ញុំសម្រេចចិត្តបញ្ចូលប្រវត្តិសង្ខេបរបស់លោកនៅក្នុងសៀវភៅនេះដែរ”។
លោក សុផល បញ្ជាក់ថា ទាំងអ្នកគាំទ្រលោក សម រង្ស៊ី និងលោកនាយករដ្ឋមន្រ្តី ហ៊ុន សែន ព្រមទាំងអ្នកនិយមកណ្តាលនឹងទទួលបានព័ត៌មានសំខាន់ៗនិងចំណេះដឹងបន្ថែមដែលមានប្រយោជន៍ពីការអានសៀវភៅនេះ។
លោក ឆាយ សុផល បន្តថា សៀវភៅនេះគឺទុកសម្រាប់ឲ្យមនុស្សជំនាន់ថ្មីបានដឹងនិងទុកជាមេរៀនដែលដិតដាមនាអតីតកាលដែលពោរពេញដោយយុទ្ធសាស្រ្ត “ទឹកឡើងត្រីស៊ីស្រមោច ទឹកហោចស្រមោចស៊ីត្រី” ជាល្បែងដណ្តើមអំណាចប្រកបដោយគ្រោះថ្នាក់បំផុតដែលឥស្សរជននយោបាយខ្មែរខ្លះបានលេងនៅក្នុងប្រវត្តិសាស្រ្តកម្ពុជា។
លោកបានបន្តថា កន្លងមកនៅពេលបានកាន់អំណាច វាគឺជារឿងអន្តរាយបំផុតសម្រាប់ជាតិនិងប្រជារាស្រ្តដែលឥស្សរជននយោបាយមួយចំនួនបានយកយុទ្ធសាស្រ្ត “ធ្វើបាប ចងអាឃាតគ្នា និងយកឈ្នះយកចាញ់ស្លាប់រស់ ដោយមិនចេះអត់ឱនឲ្យគ្នា ដែលបញ្ហានេះបានបង្កើតឲ្យមានការឈឺចាប់ និងជម្រុញឲ្យមានចលនាតស៊ូវាយបកសងសឹកគ្នាគ្មានទីបញ្ចប់។ ជាលទ្ធផល ជាតិនិងប្រជាជនទទួលនូវភាពអន្តរាយ ហើយប្រទេសជិតខាងជាអ្នកទទួលផល”។
លោក សុផល បានប្រាប់ថា លោកបានចំណាយពេលជិត៤ឆ្នាំដើម្បីបានសៀវភៅនេះ ដោយយោងលើឯកសារជាង៨០ប្រភេទ និងប្រភពមនុស្សជាច្រើននាក់ ហើយបានប្រើប្រាស់បណ្ណាល័យជាតិ បណ្ណសារដ្ឋានជាតិកម្ពុជា បណ្ណាល័យព្រឹទ្ធសភា បណ្ណាល័យមជ្ឈមណ្ឌលឯកសារកម្ពុជា បន្ទប់ព័ត៌មាននៃសាលាក្តីខ្មែរក្រហម បណ្ណាល័យមួយនៅសាកលមួយវិទ្យាល័យភូម្ទិភ្នំពេញ ដើម្បីប្រមូលឯកសារ៕
