រដ្ឋមន្ត្រី ក្រសួងព័ត៌មាន រិះគន់ព័ត៌មាន បែបពិធីការ
សារព័ត៌មាន Cambodia News/
ភ្នំពេញ (២០ សីហា ២០១៤) ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរាជរដ្ឋាភិបាល នៅថ្ងៃពុធ ទី ២០ ខែសីហា ឆ្នាំ២០១៤នេះ បានរិះគន់ ទៅលើអត្ថបទព័ត៌មាន បែប ពិធីការរបស់ស្ថានីយទូរទស្សន៍ វិទ្យុ កាសែត និងគេហទំព័រមួយចំនួននៅកម្ពុជា។
ថ្លែងបិទសិក្ខាសាលាស្ដីពី “ការលើកកំពស់ការប្រាស្រ័យឆ្លើយឆ្លង រវាងសភា និងប្រព័ន្ធផ្សព្វផ្សាយ ប្រកបដោយ ប្រសិទ្ធភាព” នៅវិមានព្រឹទ្ធសភា លោក ខៀវ កាញារីទ្ធ បន្តថា ” គ្រាន់តែទទួលអីបន្តិចបន្តួច ថតដែរ ។
ថ្ងៃមុនគ្រាន់តែគាត់(មន្ត្រី)ទៅធ្វើបុណ្យឆ្លងចេតិយ៍ឳពុកម្ដាយគាត់សោះ ដាក់ចូលព័ត៌មាន ជាតិ។
ធ្វើអញ្ជឹងអត់ត្រូវ! ប៉ុន្តែខ្ញុំបានប្រាប់ថាលើកក្រោយប្រសិនបើគាត់ទៅឆ្លងចេតិយ៍របស់ គាត់ ផ្ទាល់ ចាំដាក់។ គ្រាន់តែប៉ុណ្ណឹងដាក់ចូលព័ត៌មានជាតិទាំងមូលអត់ត្រូវ”។
ការថ្លែងរបស់រដ្ឋមន្ត្រីក្រសួងព័ត៌មានដូចនេះធ្វើឡើង ខណៈស្ថាប័នព័ត៌មានមួយចំនួនសសេរអត្ថបទបែបពិធីការ ពោលគឺការឲ្យតំលៃ ទៅលើមន្ត្រីឬបុគ្គលម្នាក់បង្ហាញសកម្មភាពចែកអំណោយ។
បើតាម លោករដ្ឋមន្ត្រី អត្ថបទព័ត៌មានបែបពិធីការនឹងសម្លាប់ស្ថាប័នព័ត៌មានរបស់ខ្លួនឯង។ លោកថា ” ព័ត៌មានសំខាន់ គឺខ្លឹមសារមិនមែនរូបភាពនោះទេ។ ប៉ុន្តែបើបង្ខំឲ្យអ្នកកាសែតធ្វើតាមខ្លួនវា ជារឿង មួយដែរខុស”៕
