យុវជនម្នាក់ត្រូវជនល្មើសមួយក្រុមបាញ់សម្លាប់
សារព័ត៌មាន Cambodia News/
ភ្នំពេញ (២៥ សីហា ២០១៤) ៖ ជនល្មើសមួយក្រុមមានគ្នា ប្រមាណជាង១០នាក់ ជិះម៉ូតូជាច្រើនគ្រឿង និងរថយន្តមួយគ្រឿង ប្រដាប់ដោយកាំបិត ស្នប់ដៃ និងកាំភ្លើង បានព្រួតវាយ និងបាញ់រះទៅលើយុវជនម្នាក់ ដែលកំពុងអង្គុយលេងបៀរ នៅតាមបណ្តោយផ្លូវបេតុងមួយកន្លែង ស្ថិតក្នុងក្រុមទី៥ ភូមិទ្រា សង្កាត់ស្ទឹងមានជ័យ ខណ្ឌមានជ័យ។
ហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោង ៤និង០០នាទីទាបភ្លឺ ថ្ងៃទី២៥ ខែសីហា ឆ្នាំ២០១៤។ យុវជនរងគ្រោះខាងលើមានឈ្មោះកង សុជាតិ អាយុ២៤ឆ្នាំ មានមុខរបរមិនពិតប្រាកដ ជាកូនច្បងក្នុងគ្រួសារ ស្នាក់នៅជិតកន្លែងកើតហេតុ។
សាក្សីនៅកន្លែងកើតហេតុ ក្នុងអំពើបាញ់ប្រហារខាងលើនេះ បានឲ្យដឹងថា នៅមុនពេលកើតហេតុគេសង្កេតឃើញ យុវជនរងគ្រោះខាងលើ កំពុងតែអង្គុយលេងបៀរ ជាមួយគ្នីគ្នា ដែលរស់នៅជិតផ្ទះរបស់ខ្លួន លុះមកដល់វេលាកើតហេតុខាងលើ ស្រាប់តែមានមនុស្សមួយ ក្រុម ជិះម៉ូតូសេរីទំនើបជាច្រើនគ្រឿង និងមានរថយន្តមួយគ្រឿង ប្រដាប់ដោយកាំបិត ស្នប់ដៃ និងរួម មានកាំភ្លើងខ្លីមិនចាំម៉ាកមួយដើមផងដែរ បានធ្វើសកម្មភាពព្រួតវាយ និង លើកកាំភ្លើងបាញ់ស្រោចទៅ លើយុវជនឈ្មោះ កង សុជាតិចំនួនពីរគ្រាប់បញ្ចិតក្បាលបណ្តាលឲ្យដួលស្លាប់ភ្លាមៗ នៅនឹងកន្លែងកើតហេតុ ហើយជនបង្កបានព្យាយាមរត់គេចខ្លួនបាត់ស្រមោលសូន្យឈឹង ។
ក្រោយកើតហេតុសមត្ថកិច្ចមូលដ្ឋានបានចុះអន្តរាគមន៍ដល់ កន្លែងកើតហេតុភ្លាមៗ និងធ្វើការ សាកសួរបន្ថែមជុំវិញករណីខាងលើ ដើម្បីស្រាវជ្រាវវែកមុខជនបង្កយកមកផ្តន្ទាទោសតាមផ្លូវច្បាប់។ បច្ចុប្បន្នសពយុវជនរងគ្រោះត្រូវបាន សាច់ញាតិយកមកតម្ពល់ធ្វើបុណ្យធ្វើបុណ្យតាមប្រពៃណីនៅ វត្តនន្ទមុន្នី៕
