សុខ សោម៉ាវត្តី បង្ហើរសំនៀងច្រៀង ឆ្លងឆ្លើយជាមួយស្វាមីយ៉ាងផ្អែមល្ហែម ក្នុងថ្ងៃខួបកំណើត
សារព័ត៌មាន Cambodia News/
ភ្នំពេញ (០១ កញ្ញា ២០១៤) ៖ កាលពីថ្មីៗនេះ ស្វាមីរបស់ អ្នកនាង សុខ សោម៉ាវត្តី បានរៀបចំពិធី ជប់លៀងខួបកំណើតឲ្យភរិយាបណ្តូលចិត្ត នៅក្នុងហាងខារ៉ាអូខេមួយកន្លែង យ៉ាងសប្បាយ រីករាយ ហើយទន្ទឹមជាមួយគ្នានោះដែល ស្វាមីភរិយាវ័យក្មេងមួយគូនេះ ក៏បានបង្ហាញពីភាព ផ្អែមល្ហែម ជាមួយគ្នាប្រៀបដូចជាគូស្នេហ៍ថ្មោងថ្មី។
ការបង្ហាញពីភាព ផ្អែមល្ហែមនេះ ដោយពួកគេទាំងពីរនាក់ ក៏បានចាប់ដៃគ្នា បង្ហើរសំនៀងច្រៀងឆ្លងឆ្លើយគ្នា ថតវីដេអូបង្ហោះពេញ បណ្តាញទំនាក់ទំនង សង្គម Facebook ធ្វើឲ្យទស្សនិកជនជាច្រើនមានការ ច្រណែន ចំពោះស្នេហារបស់ ពួកគេ មិនតិចទេ ។
កន្លងមកទស្សនិកជន និងអ្នកគាំទ្រធ្លាប់តែបានឃើញ សុខ សោម៉ាវត្តី សម្តែង និងធ្វើជា ពិធីការិនីមិនដែលបានឃើញនាងច្រៀងឡើយ ប៉ុន្តែនៅក្នុងថ្ងៃខួបកំណើត នាង បាន ចាប់ដៃគូជាមួយស្វាមីបង្ហើរសំនៀងច្រៀងឆ្លងឆ្លើយ បទចម្រៀងស្នេហា ជាមួយគ្នា យ៉ាងមានក្តីសុខបង្អួតភ្ញៀវដែលចូលរួមពិធី បើទោះជានាងនិងស្វាមី មិនសូវចេះ ច្រៀងតែពួកគេ ក៏នៅតែច្រៀង ដើម្បីធ្វើឲ្យកម្មវិធី កាន់តែមានភាពសប្បាយរីករាយ មួយកម្រិតទៀត ។
ចាប់តាំងពីគូស្នេហ៍របស់ តារាសម្តែង និងពិធីការិនី អ្នកនាង សុខ សោម៉ាវត្តី រៀបការសាង គ្រួសារជាមួយស្វាមី ដែលទស្សនិកជនស្គាល់យ៉ាងច្បាស់ថា ជាកូនប្រុសបង្កើតរបស់ លោក ទូច ណារ៉ុថ រួចមក គេសង្កេតឃើញថា ស្វាមីភរិយាមួយគូនេះ តែងតែបង្ហាញពីទឹកចិត្ត ស្រលាញ់គ្នា បង្ហាញស្នេហាផ្អែមល្ហែម ជាមួយគ្នាប្រៀបដូចជាទឹកឃ្មុំ រហូតដល់ពេលនេះ ពួកគេ ក៏បានទទួលបានចំណងដៃ អាពាហ៍ពិពាហ៍កូនស្រីម្នាក់ផងដែរ៕
