ពលរដ្ឋជាង ១០០០គ្រួសារ ក្នុងខណ្ឌដង្កោ រងគ្រោះដោយសារជំនន់ស្ទឹងព្រែកត្នោត
សារព័ត៌មាន Cambodia News/
ភ្នំពេញ៖ ដោយអនុវត្តតាមបទបញ្ជាស្នងការនគរបាលរាជធានីភ្នំពេញ ឯកឧត្តម ឧត្តមសេនីយ៍ឯក ស ថេត នៅថ្ងៃទី១៥ ខែមករា ឆ្នាំ២០២៣ អធិការដ្ឋាននគរបាលខណ្ឌដង្កោ លោក ជឹម ស៊ីថា ដឹកនាំកម្លាំងនៃអធិការដ្ឋាននគរបាលខណ្ឌដង្កោ ចុះជួយសង្គ្រោះប្រជាពលរដ្ឋជាង ១ ០០០គ្រួសារ ដែលលិចផ្ទះ ដោយសារជំនន់ទឹកភ្លៀង នៅតាមសណ្តស្ទឹងព្រែកត្នោត ។
តាមស្នងការនគរបាលរាជធានីភ្នំពេញបានឱ្យដឹងថា ជំនន់ស្ទឹងព្រែកត្នោត បានលិច ១០សង្កាត់ ក្នុងភូមិសាស្រ្តខណ្ឌដង្កោ មាន ២៩ភូមិ ដែលក្នុងនោះ ផ្ទះលិចទឹកចំនួន ៩៥៣ខ្នងផ្ទះ ១០២៦គ្រួសារ មនុស្ស ៤០៣៥នាក់ ព្រមទាំងលិចផ្លូវបេតុង ១៤ខ្សែ វត្ត២ មណ្ឌលសុខភាព២ សាលាសង្កាត់ចំនួន២ និងប៉ុស្តិ៍នគរបាលរដ្ឋបាលចំនួន២។
ស្នងការដ្ឋាននគរបាលរាជធានីភ្នំពេញក៏បានឱ្យដឹងទៀតថាសង្កាត់ ដែលលិចលង់ដោយជំនន់ទឹកស្ទឹងព្រែកត្នោតរួមមាន សង្កាត់សាក់សំពៅ ៦ភូមិ សង្កាត់ស្ពានថ្ម ៥ភូមិ សង្កាត់ក្រាំងពង្រ ៣ភូមិ សង្កាត់គងនយ ៣ភូមិ សង្កាត់ទៀន ៣ភូមិ សង្កាត់ព្រែកកំពឹស ៣ភូមិ សង្កាត់ជើងឯក ២ភូមិ សង្កាត់ព្រៃស ២ភូមិ សង្កាត់ដង្កោ ១ភូមិ និងសង្កាត់ព្រៃវែង ១ភូមិ។
ក្រសួងធនធានទឹក និងឧតុនិយមបានឱ្យដឹងថា គិតដល់ពេលនេះស្ថានភាពទឹកនៅចំណុចទំនប់ទ្វារទឹក ៧មករា មានសភាពនៅទ្រឹង ឯការលិចលង់លំនៅឋាន និងហេដ្ឋារចនាសម្ព័ន្ធនៅមានតែក្នុងតំបន់ក្រៅសណ្តរតែប៉ុណ្ណោះ ៕
