លោក ហ៊ុន សែន បញ្ជាក់ជំហរពីរឿងទទួលជនភៀសខ្លួនមកពីអូស្ត្រាលី
សារព័ត៌មាន Cambodia News/
ភ្នំពេញ (២៩ កញ្ញា ២០១៤) ៖ លោកនាយករដ្ឋមន្ត្រី ហ៊ុន សែន នៅថ្ងៃចន្ទនេះប្រកាសថា ការដែលកម្ពុជាទទួលយកជនភៀសខ្លួនមកពីប្រទេសអូស្ត្រាលីនោះ គឺជាកាតព្វកិច្ចអន្តរជាតិរបស់កម្ពុជា។
ការបញ្ជាក់នេះធ្វើឡើងបន្ទាប់ពីមានការរិះគន់ថា កម្ពុជាមិនគួរទទួលយកជនភៀសខ្លួនទាំងនោះទេ ព្រោះរដ្ឋាភិបាលកម្ពុជាមិនទាន់មានលទ្ធភាពបំពេញសេចក្តីត្រូវការរបស់ប្រជាជនខ្លួនឲ្យបានគ្រប់គ្រាន់ និងគោរពសិទ្ធិមនុស្សពេញលេញនៅឡើយ។
ប៉ុន្តែនៅក្នុងពិធីចែកសញ្ញាបត្រដល់សាកលវិទ្យាល័យមួយនៅរាជធានីភ្នំពេញលោក ហ៊ុន សែន ថ្លែងថា ការបញ្ជូនជនភៀសខ្លួនពីអូស្ត្រាលីមកកម្ពុជានេះ ធ្វើឡើងតាមគោលការណ៍ស្ម័គ្រចិត្ត ហើយក៏ជាផ្នែកកាតព្វកិច្ចអន្តរជាតិរបស់កម្ពុជាដែលត្រូវអនុវត្ត។
លោកនាយករដ្ឋមន្ត្រី ហ៊ុន សែន អះអាងទៀតថា ការដែលអូស្ត្រាលីសម្រេចចិត្តបញ្ជូនភៀសខ្លួនទាំងនោះមកកាន់កម្ពុជា ដោយសារតែអូស្ត្រាលីយល់ឃើញថា ប្រទេសកម្ពុជាមានលទ្ធភាពគ្រប់គ្រាន់ ក្នុងការផ្តល់មុខរបរដល់ពួកគេដើម្បីចិញ្ចឹមជីវិត៕
