រដ្ឋសភា បើកកិច្ចប្រជុំ អនុម័តលើការកែប្រែរដ្ឋធម្មនុញ្ញ ស្តីពី គជប
សារព័ត៌មាន Cambodia News/
ភ្នំពេញ (០១ តុលា ២០១៤) ៖ អ្នកតំណាងរាស្ត្រចំនួន ១២០ រូប ដឹកនាំដោយសម្តេច ហេង សំរិន ប្រធានរដ្ឋសភា បានបើកកិច្ចប្រជុំ កាលពីព្រឹកថ្ងៃទី១តុលា។ កិច្ចប្រជុំពេញអង្គ លើកទី៣ នីតិកាលទី៥ មានរបៀបវារៈពិភាក្សា និងអនុម័ត ចំនួន ៦ ដែលក្នុងនោះ ក៏មានសេចក្តីព្រាងច្បាប់វិសោធនកម្មរដ្ឋធម្មនុញ្ញ ពាក់ព័ន្ធនឹងគជប ផងដែរ។
សម័យប្រជុំរដ្ឋសភា លើកទី៣ នីតិកាលទី៥ នៅថ្ងៃពុធ ទី១ ខែតុលា ឆ្នាំ២០១៤ វេលាម៉ោង ៨ ព្រឹក មានរបៀបវារៈ ចំនួន ៦ រួមមាន៖ ១- ព្រះរាជសារព្រះមហាក្សត្រ សម្តេចព្រះបរមនាថ នរោត្តម សីហមុនី ជូនសម័យប្រជុំរដ្ឋសភា លើកទី៣ នីតិកាលទី៥ អានដោយសម្តេចហេងសំរិន។
២-របាយការណ៍ ស្តីពី សកម្មភាពរបស់រដ្ឋសភា ចន្លោះសម័យប្រជុំរដ្ឋសភា លើកទី២ និងលើកទី៣ នីតិកាលទី៥។
៣- ការពិភាក្សា និងអនុម័ត សេចក្តីស្នើច្បាប់ធម្មនុញ្ញ ស្តីពី វិសោធនកម្ម មាត្រា ៧៦ និងមាត្រាទាំងឡាយពីជំពូកទី១៥ថ្មី ដល់ជំពូកទី១៦ថ្មី នៃរដ្ឋធម្មនុញ្ញ នៃព្រះរាជាណាចក្រកម្ពុជា
៤-ការពិភាក្សា និងអនុម័ត សេចក្តីព្រាងច្បាប់ ស្តីពី ការអនុម័តយល់ព្រមលើពិធីសារ ណាហ្គូយ៉ា ស្តីពីសិទ្ធិទទួលផលពីធនធានសេនេនិក និងការបែងចែកផលប្រយោជន៍ពីការប្រើប្រាស់ធនធានសេនេនិកដោយស្មើភាព និងសមធម៌ នៃអនុសញ្ញាសហប្រជាជាតិ ស្តីពី ជីវៈចម្រុះ
៥- ការពិភាក្សា និងអនុម័ត សេចក្តីព្រាងច្បាប់ ស្តីពី វិសោធនកម្ម មាត្រា១ មាត្រា៣ មាត្រា៤ មាត្រា៧ មាត្រា៨ មាត្រា៩ មាត្រា១១ មាត្រា១៣ មាត្រា១៤ មាត្រា១៥ មាត្រា១៧ មាត្រា១៨ មាត្រា១៩ មាត្រា២០ មាត្រា២១ មាត្រា២៣ មាត្រា២៤ មាត្រា៣០ មាត្រា៣៤ មាត្រា៣៧ មាត្រា៣៨ មាត្រា៣៩ មាត្រា៤០ មាត្រា៤១ មាត្រា៤២ មាត្រា៤៣ មាត្រា៤៥ មាត្រា៤៩ មាត្រា៥៥ និងមាត្រា៥៦ នៃច្បាប់ស្តីពីការគ្រប់គ្រងរោងចក្រ និងសិប្បកម្ម ដែលប្រកាសឲ្យប្រើដោយព្រះរាជក្រមលេខ នស/រកម/០៦០៦/០១៨ ចុះថ្ងៃទី២៣ ខែមិថុនា ឆ្នាំ២០០៦
៦-ការពិភាក្សា និងអនុម័តសេចក្តីព្រាងច្បាប់ ស្តីពី ការអនុម័តយល់ព្រមលើកិច្ចព្រមព្រៀង ស្តីពី សហប្រតិបត្តិការវប្បធម៌ រវាងរដ្ឋាភិបាល នៃរដ្ឋជាសមាជិកនៃសមាគមប្រជាជាតិអាស៊ីអាសគ្នេយ៍ និងរដ្ឋាភិបាល នៃសហព័ន្ធរុស្ស៊ី។ ជាការកត់សម្គាល់ កិច្ចប្រជុំរដ្ឋសភាពេញអង្គនៅព្រឹកនេះ ក៏មានវត្តមានរបស់សម្តេចនាយករដ្ឋមន្ត្រី ហ៊ុន សែន ក្នុងនាមជាអ្នកតំណាងរាស្ត្រមណ្ឌលខេត្តកណ្តាល ព្រមទាំងលោកសមរង្ស៊ី តំណាងរាស្ត្រមណ្ឌលខេត្តកំពង់ចាម និងលោកកឹមសុខា អនុប្រធានទី១ រដ្ឋសភា ព្រមទាំងអង្គទូតជាមិត្តរបស់កម្ពុជាជាច្រើនរូបផងដែរ៕
