បាក់អគាររោងចក្រ គីស៊ីនគូ បណ្តាលឱ្យកម្មករមួយចំនួនរងរបួស
សារព័ត៌មាន Cambodia News/
តាកែវ (២១ តុលា ២០១៤) ៖ ការបាក់អគាររោងចក្រមួយកន្លែង ដែលមានស្លាកយីហោ គីស៊ីនគូ (Nishiku) ស្ថិតនៅតាមបណ្តោយផ្លូវជាតិលេខ២ ក្នុងភូមិឃ្លាំងសម្បត្តិ ឃុំពត់ស ស្រុកបាទី ខេត្តតាកែវ បានបាក់ធ្លាក់ទៅក្នុងទឹក ខណៈកម្មករកំពុងធ្វើការងារ បណ្តាលឱ្យកម្មករ-កម្មការិនីមួយចំនួនបានរងរបួសធ្លាក់ចូលក្នុងទឹក ប៉ុន្តែពុំមានអ្នកស្លាប់នោះទេ។
ហេតុការណ៍ភ្ញាក់ផ្អើលនោះ បានកើតឡើង កាលពីម៉ោងប្រមាណ ១០ព្រឹក ថ្ងៃទី២១ ខែតុលា ឆ្នាំ២០១៤ ស្ថិតនៅផ្លូវជាតិលេខ២ ក្នុងភូមិឃ្លាំងសម្បត្តិ ឃុំពត់ស ស្រុកបាទី ខេត្តតាកែវ។
ប្រភពព័ត៌មាន បានឲ្យដឹងថា មុនពេលកើតហេតុ គឺក្រុមកម្មករ ទាំង០២ក្រុម មានគ្នាប្រមាណជា ២០០នាក់ បានកំពុងតែនាំគ្នាធ្វើការ ស្រាប់តែបាក់ស្រុតអគារ ធ្លាក់ទាំងមនុស្ស និងម៉ាស៊ីន ចូលទៅក្នុងទឹក ដែលនៅខាងក្រោមអគារនោះ។
ក្រោយពីកើតហេតុភ្លាម សមត្ថកិច្ច ព្រមទាំងប្រជាពលរដ្ឋ ដែលនៅក្បែរនោះ បាន នាំគ្នាមកជួយអន្តរាគមន៍ និងយកជនរងគ្រោះ ចេញពីក្រោមអគារនោះ ហើយបញ្ជូនទៅកាន់មន្ទីរពេទ្យ។
ប្រភពជំហានដំបូងនេះបានបញ្ជាក់ឲ្យដឹងទៀតថា ការបាក់អគារនៅប៉ុន្មាននាទីមុននេះ មិនទាន់ដឹងបណ្តាលមកពីបញ្ហាអ្វីនៅឡើយទេ ហើយសេចក្តីរាយការណ៍បានបន្តថា មានកម្មករ-កម្មការិនី មួយចំនួនបានរងរបួសធ្លាក់ចូលក្នុងទឹក ប៉ុន្តែពុំមានអ្នកស្លាប់នោះទេ។
បើតាមសមត្ថកិច្ចកំពុងជួយអន្តរាគមន៍ នៅកន្លែងកើតហេតុ ហើយបានអះអាងថា មានកម្មករប្រមាណ ០៥នាក់ បានរងរបួស ក្នុងនោះមាន ០២នាក់រងរបួសធ្ងន់ ហើយខណៈពេលនេះ សមត្ថកិច្ច បាននិងកំពុងតែជួយអន្តរាគមន៍៕
