គ្រោះថ្នាក់ចរាចរណ៍ថ្ងៃទី១៨ មេសា ស្លាប់៧នាក់ និងរបួសធ្ងន់ស្រាល៣១នាក់
សារព័ត៌មាន Cambodia News/
ភ្នំពេញ (១៩ មេសា ២០១៦) ៖ យោងតាមរបាយការណ៍ពីនាយកដ្ឋានសណ្ដាប់ធ្នាប់ នៃអគ្គស្នងការដ្ឋាននគរបាលជាតិប្រាប់ឲ្យដឹងថា កាលពីថ្ងៃទី១៨ ខែមេសា ឆ្នាំ២០១៦ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន ៨លើក ក្នុងនោះយប់ ៤លើក បណ្ដាលអោយមនុស្សស្លាប់ ៧នាក់ ( ស្រី ៣នាក់ ) រងរបួសធ្ងន់ ១០នាក់ ( ស្រី ៣នាក់ ) និងរងរបួសស្រាល ២១នាក់ ( ស្រី ៨នាក់ ) ។
នៅ ក្នុងហេតុការណ៍គ្រោះថ្នាក់ ចរាចរណ៍ ទាំង ៨លើកនេះ បណ្ដាលឲ្យខូចខាតយានយន្ត សរុប ចំនួន ១៣គ្រឿង រួមមាន ម៉ូតូចំនួន ៧គ្រឿង រថយន្តធុនតូច ចំនួន ២គ្រឿង រថយន្តធុនធំ ៣គ្រឿង និងយានផ្សេងៗ ចំនួន ១គ្រឿង ។ ចំណែកអ្នកគ្រោះថ្នាក់ចរាចរណ៍ ដែលមិនពាក់ពួកសុវត្ថិភាព រួមមាន ៥នាក់ (យប់ ១នាក់) ។
ប្រភពព័ត៌មានដដែលប្រាប់បន្តឲ្យដឹងថា មូលហេតុដែលបណ្ដាល ឲ្យកើតមានករណីគ្រោះថ្នាក់ចរាចរណ៍ រួមមាន ល្មើសល្បឿន ២លើក (ស្លាប់ ២នាក់) , មិនប្រកាន់ស្ដាំ ២លើក (ស្លាប់ ៣នាក់) , ប្រជែងគ្រោះថ្នាក់ ១លើក (ស្លាប់ ២នាក់) , បត់គ្រោះថ្នាក់ ២លើក និងមិនគោរពសិទ្ធិ ១លើក ។
គ្រោះថ្នាក់លើដងផ្លូវ រួមមាន ផ្លូវជាតិ ចំនួន ៥លើក ផ្លូវខេត្ត/ក្រុង ចំនួន ១លើក និងផ្លូវលំ ចំនួន ២លើក ។ យានយន្តបង្កហេតុ រួមមាន ម៉ូតូ ៤លើក រថយន្តធុនតូច ១លើក រថយន្តធុនធំ ១លើក និងគោយន្ត ២លើក ។
យោង តាមរបាយការណ៍ពីនាយកដ្ឋាន សណ្ដាប់ធ្នាប់ នៃអគ្គស្នងការដ្ឋាននគរបាលជាតិប្រាប់បន្តទៀតឲ្យដឹងថា ខេត្ត រាជធានី ដែលមានគ្រោះថ្នាក់ និងរងគ្រោះថ្នាក់ច្រើន រួមមាន ខេត្តបន្ទាយមានជ័យ ២លើក ស្លាប់ ៥នាក់ (ស្រី ៣នាក់) របួស ៨នាក់ (ស្រី ២នាក់) ខេត្តក្រចេះ ១លើក ស្លាប់ ១នាក់ របួស ១៥នាក់ (ស្រី ៨នាក់) និងខេត្តបាត់ដំបង ១លើក ស្លាប់ ១នាក់ ៕
