នាយករដ្ឋមន្ត្រី បញ្ជាឲ្យបញ្ចុះតម្លៃប្រេងសាំងបន្ថែមទៀត ព្រោះទីផ្សារអន្តរជាតិ ធ្លាក់ថ្លៃច្រើនហើយ
សារព័ត៌មាន Cambodia News/
ភ្នំពេញ (១៨ ធ្នូរ ២០១៤) ៖ ក្នុងពិធីចែកសញ្ញាប័ត្រដល់និស្សិតបញ្ចប់ការសិក្សា នៅព្រឹកថ្ងៃទី១៨ ខែធ្នូ ឆ្នាំ២០១៤ នៅវិទ្យាស្ថានជាតិអប់រំ នៅជិតវិមានឯករាជ្យ លោកនាយករដ្ឋមន្ត្រី ហ៊ុន សែន បានប្រកាសថា តម្លៃប្រេងលើទីផ្សារអន្តរជាតិ បន្តធ្លាក់ចុះ នៅពេលនេះ ដូច្នេះក្នុងស្រុកក៏ត្រូវតែធ្លាក់ថ្លៃដែរ។ លោក ហ៊ុនសែន ក៏បានងាកមកក្រោយ ហើយបញ្ជាឲ្យលោកឧបនាយករដ្ឋមន្ត្រី គាត ឈន់ អតីតរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ត្រូវពិនិត្យលើការបញ្ចុះតម្លៃប្រេងបន្ថែមទៀត នៅក្នុងប្រទេសកម្ពុជា។
នាយករដ្ឋមន្ត្រី ក៏បានថ្លែងការពារក្រុមហ៊ុនលក់ប្រេងក្នុងប្រទេសកម្ពុជា ដែលមិនបានបញ្ចុះតម្លៃប្រេង ឲ្យបានលឿន នៅពេលដែលតម្លៃប្រេងលើទីផ្សារអន្តរជាតិ បានធ្លាក់ថ្លៃ។ តាម លោកនាយករដ្ឋមន្ត្រី ហ៊ុន សែន មកពីក្រុមហ៊ុនលក់ប្រេងនៅកម្ពុជា បានទិញប្រេងស្តុកទុកជាច្រើនខែ ពោលគឺទិញពេលប្រេងនៅថ្លៃ ដូច្នេះក្រុមហ៊ុនទាំងនោះ ត្រូវលក់ចេញវិញ ក្នុងតម្លៃថ្លៃ មិនអាចចុះឲ្យបានលឿនដូចទីផ្សារអន្តរជាតិនោះទេ។
យ៉ាងណាក៏ដោយ លោក ហ៊ុនសែន បានគូសបញ្ជាក់ថា ប្រេងក្នុងស្រុកចុះថ្លៃយឺត គឺចុះយឺត ប្រសើរជាងមិនចុះ។ លោក ហ៊ុនសែន ក៏បានបន្ថែមថា កន្លងមក ក្រុមហ៊ុនលក់ប្រេង ចំនួន ៣ ស្រួលនិយាយគ្នា តែក្រុមហ៊ុនប្រេង ២ នៅក្រៅស្រុក ( Total និង Caltex ) ពិបាកនិយាយគ្នា ដោយសារគេថា ត្រូវសុំយោបល់មេ នៅក្រៅស្រុក គឺក្រុមហ៊ុន១ នៅបារាំង និង១ទៀត នៅអាមេរិក។
សូមរម្លឹកថា កាលពីថ្ងៃទី២០ ខែវិច្ឆិកា ឆ្នាំ២០១៤ ក្រសួងពាណិជ្ជកម្ម បានប្រកាសពីការបញ្ចុះតម្លៃប្រេងសាំង នៅក្រោម ៥០០០ រៀល ក្នុងមួយលីត្រ នៅតាមស្ថានីយរបស់ក្រុមហ៊ុនលក់ប្រេងសាំងក្នុងស្រុក រួមមាន ក្រុមហ៊ុនប្រេងសាំង សូគីម៉ិច ក្រុមហ៊ុនតេលា និងក្រុមហ៊ុន សាវីមិច៕
