សម័យនេះទៅហើយ នៅមានសាលារៀនក្រោមដើមឫស្សីទៀត
សារព័ត៌មាន Cambodia News/
ភ្នំពេញ (២៩ ធ្នូរ ២០១៤) ៖ រូបថតសិស្សានុសិស្សក្នុងឈុតខោ សំពត់ខៀវ អាវស អង្គុយលើតុឈើតម្រៀបគ្នាយ៉ាងមានរបៀប ដោយយកម្លប់គុម្ពឫស្សីធ្វើជាថ្នាក់រៀនដំបូលប្រក់មេឃនោះ បានធ្វើឲ្យមានការផ្អើលពេញបណ្តាញសង្គមហ្វេសប៊ុក និងចោទសួរថា តើសាលានៅឯណាម្តេចវេទនាម្ល៉េះ? ។
មានការបញ្ជាក់ថា នោះគឺជាទិដ្ឋភាពពិតនៃការបង្រៀន និងរៀននៅឯអនុវិទ្យាល័យផ្អាវ ស្ថិតនៅក្នុងភូមិ ប្រាសាទចំបក ឃុំផ្អាវ ស្រុក ត្រពាំងប្រាសាទ ខេត្តឧត្តរមានជ័យ តំបន់ជាយដែន កម្ពុជា-ថៃ ស្ថិតនៅចម្ងាយប្រមាណ៤០គីឡូម៉ែត្រពីទីរួមស្រុក។
មានការបញ្ជាក់ថា មិនថា តែសាលារៀនផ្អាវមួយនេះទេ សាលាជាច្រើនស្ថិតក្នុងតំបន់នោះ សុទ្ធតែជួបបញ្ហាប្រឈមទាំងនេះដូចគ្នា ដែលគួរតែរដ្ឋាភិបាលជួយគិតគូរឲ្យបានខ្លាំង។ ទាំងសិស្សានុសិស្ស និងលោកគ្រូ អ្នកគ្រូនៅតំបន់នោះបានសម្តែងក្តីសង្ឃឹមថា នៅថ្ងៃអនាគតពួកគាត់នឹងទទួលបានអគារសិក្សាល្អៗសម្រាប់ជាថ្នាលបណ្តុះបណ្តាលកូនចៅជំនាន់ក្រោយឲ្យបានល្អប្រសើរមិនចាញ់ទីក្រុង៕
