ប្រាក់ឈ្នួលកម្មករកាត់ដេរ ១២៨ដុល្លារ នឹងអនុវត្តចាប់ពីខែមករានេះទៅ
សារព័ត៌មាន Cambodia News/
អត្ថបទ៖ ហេង នាង
ភ្នំពេញ (០៦ មករា ២០១៥) ៖ ប្រាក់ខែគោលអប្បបរមារបស់កម្មករនិយោជិក ដែលនឹងត្រូវទទួលបានមានចំនួន ១២៨ ដុល្លារ ស្របតាមការសម្រេចរបស់គណៈកម្មការប្រឹក្សាការងារ និងការជួយឧបត្ថម្ភបន្ថែមពីប្រមុខរដ្ឋាភិបាល នឹងចាប់ផ្តើមអនុវត្តជាផ្លូវការនៅក្នុងខែមករា ឆ្នាំ២០១៥នេះតទៅ។
កន្លងមកគណៈកម្មការប្រឹក្សាការងារ ត្រីភាគី ដែលមានតំណាងរាជរដ្ឋាភិបាល៩រូប និងតំណាងនិយោជិក៩រូប បានពិភាគ្សាជាច្រើនលើកច្រើនសារ និងបានបោះឆ្នោតជាសម្ញាត់ទទួលលទ្ធផលជាតួលេខចំនួន ១១០ដុល្លារ ៧សម្លេង លើ២៥សម្លេង ១២៣ដុល្លារ ១៦សម្លេងលើ ២៥សម្លេង និង១៤០ដុល្លារ ២សម្លេងលើ២៥សម្លេង។
ដោយអនុវត្តតាមរយៈការបោះឆ្នោតនៅគណៈកម្មការប្រឹក្សាការងារបានសម្រេចយកចំនួនតួលេខ ១២៣ដុល្លារ និងការជួយឧបត្ថម្ភបន្ថែមពីប្រមុខរដ្ឋាភិបាលចំនួន៥ដុល្លារ លើចំនួនទឹកប្រាក់១២៣ដុល្លារ ហេតុនេះបានធ្វើឲ្យប្រាក់ឈ្នួលអប្បបរមាកម្មករនិយោជិក ផ្នែកវាយនភណ្ឌកាត់ដេរ និងផលិតស្បែកជើងនៅឆ្នាំ២០១៥ មានចំនួន១២៨ដុល្លារក្នុងមួយខែ ដោយគិតចាប់ពីខែមករានេះតទៅ។
គួរបញ្ជាក់ថា ប្រាក់អត្ថប្រយោជន៍ផ្សេងទៀត ដែលកម្មករនិយោជិកធ្លាប់ទទួលបានកន្លងមក ត្រូវបានរក្សាទុកដដែល មានដូចជា ប្រាក់សោហ៊ុយធ្វើដំណើរ និងស្នាក់នៅចំនួន៧ដុល្លារក្នុងមួយខែ ប្រាក់ថ្លៃបាយធ្វើការបន្ថែមម៉ោងដោយស្ម័គ្រចិត្តចំនួន២០០០រៀល ក្នុងមួយថ្ងៃ និងប្រាក់រង្វាន់អតីតភាពការងារចំនួន ២ដុល្លារ ដល់១១ដុល្លារក្នុងមួយខែ សម្រាប់កម្មករនិយោជិក ដែលធ្វើការចាប់ពីឆ្នាំទី២ ដល់ឆ្នាំទី១១ ដូច្នេះកម្មករនិយោជិកម្នាក់ និងទទួលបានប្រាក់ឈ្នួលយ៉ាងតិច១៤៧ដុល្លារ ទៅ១៥៦ដុល្លារក្នុងមួយខែ៕
