គណបក្សប្រជាជន មានអ្នកចូលរួមហែក្បួនឃោសនាជាង ១ម៉ឺននាក់
Cambodia News
ភ្នំពេញ៖ នៅថ្ងៃទី២៧ មិថុនា ដែលជាថ្ងៃដំបូង គណបក្សប្រជាជនកម្ពុជា ចាប់ផ្តើមហែក្បួនឃោសនារកសំឡេងឆ្នោត មានអ្នកចូលរួមជាង១ម៉ឺន ដោយចាប់ផ្តើមចេញពី កោះពេជ្រ រួចឆ្ពោះទៅតំបន់ផ្សេងៗ នៅរាជធានីភ្នំពេញ និងទៅគោលដៅតាមខេត្តបន្ត។
សមាជិកគណបក្សប្រជាជនមកពីគ្រប់ខណ្ឌ នៅរាជធានីភ្នំពេញ និងមកពីបណ្តាខេត្តមួយចំនួនផង បានមកជួបជុំគ្នានៅកោះពេជ្រ ដោយពាក់អាវ និងមួក និមិត្តសញ្ញាគណបក្សប្រជាជន រូបទេវតា។ ក្នុងពិធីជួបជុំ មុនហែក្បួនចេញនេះ មានការចូលរួមពីថ្នាក់ដឹកនាំបក្សទាំងបី គឺលោកប្រធានព្រឹទ្ធសភា ជា ស៊ីម ជាប្រធាន លោក ប្រធានរដ្ឋសភា ហេង សំរិន ជាប្រធានកិត្តិយស និងលោកនាយករដ្ឋមន្ត្រី ហ៊ុន សែន ជាអនុប្រធានបក្ស។
ក្នុងក្បួនរៀបចំហែមាន រៀបចំទង់បក្ស រូបថ្នាក់ដឹកនាំទាំងបី និងមានឧបករណ៍បំពងសំឡេង ផ្សព្វផ្សាយពីគោលនយោបាយបក្ស និងគុណសម្បត្តិរបស់គណក្សដល់ សាធារណៈជនផងដែរ៕