ក្រសួងមហាផ្ទៃអំពាវនាវឲ្យប្រជាពលរដ្ឋមានអាយុចាប់ពី ១៥ឆ្នាំឡើង ទៅធ្វើអត្តសញ្ញាណប័ណ្ណ
សារព័ត៌មាន Cambodia News/
ភ្នំពេញ (២៣ កុម្ភៈ ២០១៥) ៖ អត្តសញ្ញាណប័ណសញ្ជាតិខែ្មរជាឯកសារគតិយុត្តិដ៏សំខាន់ចាំបាច់មួយសម្រាប់បញ្ជាក់អំពីអត្តសញ្ញារបស់បុគ្គលម្នាក់ៗដើម្បីធានាដល់ការលើកកម្ពស់សិទ្ធិ សេរីភាព ផលប្រយោជន៍ និងកាតព្ធកិច្ចនានាក្នុងសង្គមជាពិសេសការអនុវត្តន៍សិទ្ធិខាងនយោបាយក្នុងុដំណើរការបោះឆ្នោតទាំងថ្នាក់មូលដ្ឋាន និងថ្នាក់ជាតិ។
យោងតាមសេចក្តីអំពាវនាវរបស់ក្រសួងមហាផ្ទៃកាលពីពេលថ្មីៗនេះបានឲ្យដឹងថា ប្រជាពលរដ្ឋទាំងពីរភេទ ដែលមានអាយុចាប់ពី ១៥ឆ្នាំឡើង ដែលមិនទាន់មានអត្តសញ្ញាណប័ណសញ្ជាតិខែ្មរ ឫប្រជាពលរដ្ឋខ្មែរ ដែលមានអត្តសញ្ញាណប័ណសញ្ជាតិខែ្មររួចហើយប៉ុន្តែបាត់ ឫខូចត្រូវទៅបំពេញបែបបទសុំផ្តល់អត្តសញ្ញាណប័ណសញ្ជាតិខែ្មរនៅតាមមូលដ្ឋានដែលខ្លួនរស់នៅ ឫនៅតាមស្ថានីយ៍ចល័ត ដែលអាជ្ញាធរមានសមត្ថកិច្ចបានផ្សព្វផ្សាយជូនដំណឹង។
តាមសេចក្តីអំពាវនាវដដែលបានឲ្យដឹងទៀតថា នៅពេលអញ្ជើញទៅបំពេញបែបបទសុំផ្តល់អត្តសញ្ញាណប័ណសញ្ជាតិខែ្មរ ប្រជាពលរដ្ឋទាំងពីរភេទត្រូវកាន់ភ្ជាប់មកជាមួយនូវសំបុត្រ កំណើរ សៀវភៅស្នាក់នៅ ឫសៀវភៅគ្រួសារ ឫលិខិតបញ្ជាក់ពីការបាត់អត្តសញ្ញាណប័ណសញ្ជាតិខែ្មរ។
គួរបញ្ជាក់ថា សមត្តកិច្ចពាក់ព័ន្ធគ្រប់លំដាប់ថ្នាក់ ពិសេសគណៈកម្មការជំរុញផ្តល់អត្តសញ្ញាណប័ណសញ្ជាតិខែ្មររាជធានី ខេត្ត ក្រុង ស្រុក ខណ្ឌ ត្រូវធ្វើការផ្សព្វផ្សាយអប់រំណែនាំដល់ប្រជាពលរដ្ឋឲ្យបានដឹងអំពីសារសំខាន់ និងផលប្រយោជន៍ចំពោះប្រទេសជាតិក្នុងការទទួលបានអត្តសញ្ញាណប័ណសញ្ជាតិខែ្មរ៕
