យុវជនម្នាក់ ត្រូវជនមិនស្គាល់មុខកាប់ស្លាប់ ខណៈពេលកំពុងជិះម៉ូតូ
សារព័ត៌មាន Cambodia News/
ភ្នំពេញ (១៩ មីនា ២០១៥) ៖ កាលពីព្រឹកថ្ងៃទី១៩ ខែមីនា នេះ យុវជនម្នាក់ ជាសិស្សសាលា ត្រូវបានជនបង្កមិនទាន់ស្គាល់អត្ដសញ្ញាណ កាប់ប្រហារ ពីក្រោយបណ្ដាលឱ្យ ធ្លាក់ពីលើ ម៉ូតូស្លាប់ភ្លាមៗ នៅកន្លែងកើតហេតុ ស្ថិតនៅទល់មុខ សភាពាណិជ្ជកម្ម តាមបណ្ដោយផ្លូវសហព័ន្ធ រុស្សី សង្កាត់ទឹកល្អក់ទី១ ខណ្ឌទួលគោកខណៈដែលជនរងគ្រោះកំពុងជិះម៉ូតូពីក្រោយមិត្ដភក្ដិ ។
យោងតាមប្រភពព័ត៌មានពីកន្លែងកើត ហេតុ បានឱ្យដឹងថា ជនរងគ្រោះអាយុជាង ២០ឆ្នាំ ជាសិស្សសាលា បានជិះម៉ូតូជាមួយមិត្ដភក្ដិរបស់ខ្លួន ម៉ាកហុង ដា សេ១២៥ ស៊េរីឆ្នាំ២០១៣ ពាក់ស្លាកលេខ ភ្នំពេញ 1PR-8540 ក្នុងទិសដៅពីកើតទៅលិច ដោយជនរងគ្រោះ ជិះពីក្រោយ ស្រាប់តែពេលជិះដល់មុខសភាពាណិជ្ជកម្ម ក៏លេចមុខជនបង្កជិះម៉ូតូពីក្រោយកាប់ នឹងកាំបិតបណ្ដាលឱ្យជនរងគ្រោះធ្លាក់ពីលើម៉ូតូស្លាប់ភ្លាមៗនៅកន្លែងកើតហេតុតែម្ដង ។
ប្រភពព័ត៌មានបានបន្ដទៀតថា ក្រោយកាប់ប្រហាររួចជនបង្ក ទំនងជាសិស្សសាលា ដូចគ្នានិងមាន គំនុំនោះ បានបើកម៉ូតូគេចខ្លួនបាត់ដោយសុវត្ថិភាព រីឯសមត្ថកិច្ចបាន ហៅមិត្ដភក្ដិជនរងគ្រោះ ដែលជា ឌុបយកទៅសួរនាំ ដើម្បីចង់ដឹងពីដំណើររឿង តាមចាប់ជនបង្ក យកមកផ្ដន្ទាទោសតាមផ្លូវច្បាប់ ៕
