ជីវប្រវត្តិសង្ខេបរបស់លោក ប៉ែន សមិទ្ធិ ពន្ធនាយកកាសែតរស្មីកម្ពុជា
សារព័ត៌មាន Cambodia News/
ភ្នំពេញ( ៣០ មីនា ២០១៥ ) ៖ លោកប៉ែនសមិទ្ធិកើតនៅថ្ងៃទី១៦ ខែតុលា ឆ្នាំ១៩៦១នៅភូមិកំពង់ចាមឃុំកំពង់ ចាម ស្រុកកំពង់សៀមខេត្តកំពង់ចាមក្នុងគ្រួសារកសិករមួយដែល មានប្រវត្តិជាអ្នកសិក្សារៀនសូត្រ។ [អានបន្ត ]
កាលពីកុមារភាព លោកប៉ែន សមិទ្ធិ បានសិក្សានៅសាលាបឋមសិក្សាវត្តដីដុះ ក្នុងស្រុកកំពង់សៀម ខេត្តកំពង់ចាម បន្ទាប់មកសិក្សានៅវិទ្យាល័យឥន្ទ្រទេវី ទួលគោក ភ្នំពេញ រហូតដល់ឆ្នាំ១៩៧៥។
ចាប់ពីឆ្នាំ១៩៧៥-១៩៧៩ លោករស់នៅក្នុងរបបប៉ុលពត នៅភូមិកន្សោមអក ឃុំកន្សោមអក ស្រុកកំពង់ត្របែក ខេត្តព្រៃវែង។ ពីឆ្នាំ១៩៧៩-១៩៨០ គឺក្រោយរបបប៉ុលពត លោកបានសាងផ្នួសជាសាមណេរ នៅវត្តបាភ្នំ ស្ថិតនៅក្នុងស្រុកបាភ្នំ ខេត្តព្រៃវែង។
លោក ប៉ែន សមិទ្ធិ បានទទួលសញ្ញាបត្រជាន់ខ្ពស់ជាច្រើនដូចជា៖ – បានទទួលសញ្ញាបត្រស្រាវជ្រាវវប្បធម៌ខ្មែរ រាជធានីភ្នំពេញ (១៩៨០-១៩៨១)។ – បានទទួលសញ្ញាបត្រជាន់ខ្ពស់ផ្នែក វិទ្យាសាស្ត្រនយោបាយ នៅវិទ្យាស្ថានង្វៀនអាយគួក ទី៧ នៃប្រទេសវៀតណាម (១៩៨៤-១៩៨៦)។ – បានទទួលបរិញ្ញាបត្រ ផ្នែកសារព័ត៌មាននៅអតីតសហភាពសូវៀត នា ឆ្នាំ១៩៨៧។
លោក ប៉ែន សមិទ្ឋិ ត្រូវបានចាត់ទុកជាអ្នកសារព័ត៌មានវិជ្ជាជីវ: មានសមត្ថភាពខ្ពស់ និង បានចូលរួមចំណែកយ៉ាងធំធេងបំផុតក្នុងការធ្វើឲ្យវិស័យសារព័ត៌មាននៅប្រទេសកម្ពុជាមានការរីកចម្រើន។
នៅអំឡុងឆ្នាំ១៩៧៩ ដល់១៩៨១ លោក ប៉ែន សមិទ្ឋិ ជាបុគ្គលិកមន្ទីរឃោសនា និងពត៌មានរាជធានីភ្នំពេញ ។ ពីឆ្នាំ១៩៨១-១៩៩៣ ជាអ្នកយកពត៌មាននិងជានិពន្ធនាយកកាសែតភ្នំពេញ ។ ឆ្នាំ១៩៩៤ ជាសមាជិកគណកម្មាធិការនាយកសមាគមអ្នកសារពត៌មានខ្មែរ ។ ឆ្នាំ១៩៩៥-១៩៩៩ អនុប្រធានសម្ពន្ធ័អ្នកសារពត៌មានកម្ពុជា ។
ចាប់ពីខែសីហា ឆ្នាំ២០០០ ដល់បច្ចុប្បន្នជាស្ថាបនិកនិងជាប្រធានក្លឹបអ្នកកាសែតកម្ពុជា (កអក) ។ ចាប់ពីខែមេសា ឆ្នាំ១៩៩៣រហូតដល់បច្ចុប្បន្នជាស្ថាបនិក និងជានិពន្ធនាយកកាសែតរស្មីកម្ពុជា ។ នាខែកក្កដា ឆ្នាំ២០០៨ មកដល់បច្ចុប្បន្នជាអគ្គនាយកគេហទំព័រ CEN.com.kh ។ នាខែកញ្ញា ឆ្នាំ២០០៨ ដល់បច្ចុប្បន្នជាសាស្ត្រចារ្យនៅដេប៉ាតឺម៉ង់ប្រព័ន្ធផ្សព្វផ្សាយនិងសារ គមនាគមន៍នៃសាកលវិទ្យាល័យភូមិន្ទភ្នំពេញ ៕
