១យប់ចោរលួច គាស់ស្លាក លេខរថយន្តជាង ៣០គ្រឿង
សារព័ត៌មាន Cambodia News/
ភ្នំពេញ (១០ មេសា ២០១៥) ៖ ប្រជាពលរដ្ឋជាច្រើនគ្រួសារ ដែលរស់នៅក្នុងបុរីពិភពថ្មី ស្ថិតក្នុងភូមិច្រេស សង្កាត់ ភ្នំពេញ ខណ្ឌសែន ត្រូវបានក្រុម ចោរលូចគាស់ យកស្លាកលេខរថយន្តរបស់ពួកគាត់ អស់ ប្រមាណជាង ៣០គ្រឿង នៅម៉ោងប្រមាណ ២៖០០នាទី យប់ថ្ងៃទី៩ ខែមេសា ឆ្នាំ២០១៥។ [ អានបន្ត ]
ជនរងគ្រោះដែលមានរថយន្តម៉ាក Lexus RX 300 ពាក់ស្លាកលេខ ភ្នំពេញ AC-2658 ហើយត្រូវបានចោរលួចគាស់យកទៅបាត់ ក្នុងចំណោមជនរងគ្រោះជាច្រើននាក់ ផ្សេងទៀតបានប្រាប់ FRESH NEWS ថា ក្រុមចោរបានគាស់ស្លាកលេខរថយន្ត របស់ប្រជាពលរដ្ឋ ទាំងមុខទាំងក្រោយ ហើយស្លាកលេខ នោះទៀតសោធ សុទ្ធជាស្លាកលេខស៊េរីថ្មី ដែលមានអក្ស AB , AC ,AD និង AE ជាដើម ដោយរថយន្តទាំងនោះ បានចតទុកចោលនៅមុខផ្ទះរបស់ពួកគាត់ ដូចជារៀងរាល់ថ្ងៃ ហើយបុរីពិភពថ្មីនេះទៀតសោធ សុទ្ធតែមាន សន្តិសុខយាមកាមត្រឹមត្រូវ តែចម្លែកអីនៅថ្ងៃកើតហេតុនោះ ស្រាប់តែត្រូវចោរលួយគាស់ស្លាកលេខបាត់អស់។
បន្ទាប់ពីត្រូវចោរលួចគាស់ស្លាកលេខយកទៅបាននោះ ក្រុមប្រជាពលរដ្ឋរងគ្រោះបាននាំគ្នាទៅដាក់ពាក្យនៅ ប៉ុស្តិ៍នគរបាលរដ្ឋបាលភ្នំពេញថ្មី ដើម្បីជួយដោះស្រាយ។ ប្រជាពលរដ្ឋក៏បានអំពាវនាវ ដល់សមត្ថកិច្ចមេត្តារឹតបន្តឹងសន្តិសុខ ជូនប្រជាពលរដ្ឋផង ខណៈរឿងនេះជារឿងចោរកម្ម ដ៏គួរឲ្យភ័យខ្លាច លើកនេះចោរគាស់ត្រឹមស្លាកលេខរថយន្ត ថ្ងៃក្រោយអាចគាស់ផ្ទះ និងអំពើផ្សេងៗទៀតជាដើម៕
