បក្សសង្គ្រោះជាតិចោទថា ការមិនប្រមូលសំរាមនៅទីលានប្រជាធិបតេយ្យជាគំនិតរបស់អាជ្ញាធរ
ភ្នំពេញ៖ នៅព្រឹកថ្ងៃទី២១ ខែធ្នូរនេះ តំណាងរាស្ត្រជាប់ឆ្នោតគណបក្សសង្គ្រោះជាតិ ថ្លែងទៅកាន់បាតុករថា ការដែលក្រុមហ៊ុន ស៊ិនទ្រី មិនមកប្រមូលសំរាមនៅជុំវិញទីលានប្រជាធេបតេយ្យ ព្រោះតែអាជ្ញាធរបញ្ជាមិនឲ្យចូលទៅប្រមូល។
លោក អេង ឆៃអ៊ាង បេក្ខជនជាប់ឆ្នោតគណបក្សសង្គ្រោះជាតិ បានថ្លែងទៅកាន់ក្រុមបាតុករនៅព្រឹកថ្ងៃសៅរ៍ ទី ២១ ខែធ្នូ នៅទីលានប្រជាធិបតេយ្យនេះថា មន្ត្រីអាជ្ញាធរមានចេតនាបង្កបញ្ហាដល់ការធ្វើបាតុកម្មរបស់ខ្លួន ដោយបានហាមឃាត់ក្រុមហ៊ុនស៊ិនទ្រី ចូលប្រមូលសំរាមនៅជុំវិញនោះ នាំឲ្យមានផលវិបាកដល់បាតុករ បន្ទាប់មកគណបក្សសង្គ្រោះជាតិបានជួលឡានផ្សេងមកដឹកសំរាមចេញ តែត្រូវបានអាជ្ញាធរហាមឃាត់មិនឲ្យចាក់ដាក់កន្លែងចាក់សំរាមទៀត។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានលើកឡើងថា អាជ្ញាធរមិនដែលរារាំងប្រមូលសំរាមអីនោះទេ ហើយកិច្ចការរក្សាបរិស្ថាននៅទីលានប្រជាធិបតេយ្យសាលារាជធានីមិន ទទួលខុសត្រូវទេ គឺគណបក្សសង្គ្រោះជាតិត្រូវធានារ៉ាប់រងដោយខ្លួនឯង៕ នាង/Cambodia News