នាយករដ្ឋមន្ត្រី ទទួលយកកុមារា រងគ្រោះដោយការធ្វើទារុណកម្ម ពីសង្ឃ ទៅចិញ្ចឹម
សារព័ត៌មាន Cambodia News/
បន្ទាយមានជ័យ (០៥ កក្កដា ២០១៤) ៖ កុមារា អាយុ៩ឆ្នាំ ឈ្មោះ តន រតនា ហៅស្វិត ដែលរងគ្រោះដោយសារអំពើទារុណកម្មឃោរឃៅព្រៃផ្សៃ ពីអតីតសង្ឃ នៅវត្តប្រាសាទស្រះឈ្នួរ ឃុំឈ្នួរមានជ័យ ស្រុកព្រះនេត្រព្រះ ត្រូវបានលោកនាយករដ្ឋមន្ដ្រី ហ៊ុន សែន និង លោក ស្រីកិត្ដិព្រឹទ្ធបណ្ឌិត យកទៅចិញ្ចឹម និងផ្ដល់ការសិក្សា រហូតដល់ធំពេញវ័យ។
លោកឧត្ដមសេនីយ៍ អាត់ ខែម ស្នងការនគរបាលខេត្ដបន្ទាយមានជ័យ បានថ្លែងថា ក្មេងប្រុស តន រតនា ត្រូវបានឲ្យទៅក្រុមយុវជនស្ម័គ្រចិត្ត កាលពីថ្ងៃទី០៣ ខែកក្កដា ឆ្នាំ២០១៤ ដើម្បីយកទៅពិនិត្យព្យាបាល ឲ្យជាសះស្បើយ។
កុមារានេះ មានទីលំនៅជាមួយម្តាយឈ្មោះ ធៀម និងឪពុកឈ្មោះ ណាក់ នៅខេត្តក្រចេះ តែម៉ែឪរបស់កុមារនោះ បានបែកបាក់គ្នា បន្សល់ទុកកូន ៣នាក់ កុមាររងគ្រោះ ជាកូនកណ្តាល។កុមារាបានមករស់នៅជាមួយអតីតសង្ឃ ឈ្មោះ ខាត់ សុទី និងសង្ឃ ៦អង្គទៀត ពីក្រចេះ មកខេត្តបន្ទាយមានជ័យ។ថ្មីៗនេះ អតីតសង្ឃបរាជិកមួយអង្គ ឈ្មោះ ខាត់ សុទី បានធ្វើទារុណកម្មឃោរឃៅព្រៃផ្សៃ ហើយទើបបែកធ្លាយ និងត្រូវចាប់ខ្លូន កាលពីថ្ងែទី០២ ខែកក្កដា ឆ្នាំ២០១៤។
ទារុណកម្មលើកុមារារងគ្រោះនោះ មានវាយខ្សែភ្លើង និងយកខ្សែភ្លើងឆក់ យកទៀនសំរក់លើរាងកាយ ស្រោចទឹកក្តៅ និងជះលើរាងកាយ សំឡុត និងគម្រាម ព្រមទាំងចាប់បង្ខាំងទុក។
ក្រោយ មក លោកនេន ដែលមកជាមួយ បាន រាយការណ៍ប្រាប់អាជ្ញាធរ និងសមត្ថកិច្ច ចុះទៅជួយអន្ដរាគមន៍ និងជួយក្មេង រងគ្រោះឱ្យ មានសេរីភាពឡើងវិញ៕
