សម្តេចតេជោ ហ៊ុនសែន៖ ការប្រឆាំងភេរវកម្មជាអាទិភាពនៃគោលនយោបាយរាជរដ្ឋាភិបាល
សារព័ត៌មាន Cambodia News/
ភ្នំពេញ (១២ ធ្នូ ២០១៧) ៖ ក្នុងឱកាសអញ្ជើញជាអធិបតីភាព ក្នុងពិធីសម្ពោធដាក់ឱ្យប្រើប្រាស់នូវហេដ្ឋារចនាសម្ព័ន្ធអគារហ្វឹកហ្វឺនជំនាញចារកម្ម និង បុកគ្រឹះសាងសង់សាលប្រជុំនៃអគ្គនាយកដ្ឋានស្រាវ ជ្រាវចារកិច្ច នៅខណ្ឌព្រែកព្នៅ រាជធានីភ្នំពេញ នាព្រឹកថ្ងៃទី ១២ ខែ ធ្នូ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍ថា ៖ រាជរដ្ឋាភិបាលកម្ពុជាបានចាត់ទុកការប្រយុទ្ធប្រឆាំងភេរវកម្មជាអាទិភាពនៃគោលនយោបាយរបស់រាជរដ្ឋាភិបាល និងក៏ជាអាទិភាបនៃវិស័យសន្តិសុខជាតិរបស់កម្ពុជាផងដែរ ។
សម្តេចតេជោ បានបន្តថា ៖ យើងមិនអាចឲ្យអំពើភេរវកម្មកើតមានឡើងនៅលើទឹកដីកម្ពុជាបានទេ ។ យើងក៏មិនចង់ឃើញប្រទេសនៅក្នុងតំបន់មានកើឡើងនូវ អំពើភេរវកម្មផងដែរ។ យើងបន្តសហការជាមួយពិភពលោកដើម្បីប្រយុទ្ធប្រឆាំងអំពើភេរវកម្ម ។
សម្តេចតេជោនាយករដ្ឋមន្ត្រីក៏បានលើកឡើងផងសម្រាប់ជាគំនិតដល់អ្នកធ្វើការងារខាងចារកម្មថា៖ ការធ្វើចារកម្មគឺត្រូវតែផ្អែកទៅលើទស្សននៃការវិភាគលើបីចំណុច ដែលសម្តេចបានធ្លាប់ធ្វើកន្លងមកដោយផ្អែកទៅលើចំណុច៣ទី១.ផ្អែកលើទស្សនៈប្រវត្តិសាស្ត្រ ,ទី២.ផ្អែកលើទស្សនៈវិចារវិទ្យា និងទី៣.គឺផ្អែកទៅលើឡូស៊ិច ។ ចំណុចទាំងបីនេះបានធ្វើឲ្យការវិភាគរបស់សម្តេចទទួលបានជោគ ជ័យនិងមានភាពត្រឹមត្រូវ ៕
