ការប្រឈមមុខដាក់គ្នាក្នុងពេលស្តារប្រឡាយនៅមុខបុរីពិភពថ្មីកំបូល
សារព័ត៌មាន Cambodia News
កំបូល៖ ប្រជាពលរដ្ឋរាប់រយនាក់នៅតាមដងផ្លូវជាតិលេខ៤ម្តុំចំណុចមុខទីតាំងបុរីពិភពថ្មី ប៉ែកខាងឆ្វេងដៃពីរាជធានីភ្នំពេញ មានការភ្ញាក់ផ្អើលយ៉ាងខ្លាំងកាលពីព្រឹកថ្ងៃទី២៦ ខែឧសភា ឆ្នាំ២០១៥ នេះ ដោយសារមានការប្រឈមមុខដាក់គ្នា ខណៈដែលក្រុមហ៊ុន អេហ្សិត កំពុងអនុវត្តការងារជីកកាយ និងស្តារប្រឡាយស្របតាមផ្លូវជាតិនៅមុខបុរីនេះ។
បន្ទាប់ពីភាគីក្រុមហ៊ុនបុរីពិភពថ្មីបានរារាំងមិនឲ្យជីកកាយនិងស្តារប្រឡាយនៅមុខបុរីរបស់ខ្លួន ភាគីខាងក្រុមហ៊ុន អេហ្សិត ក៏បានបោះបង្គោលរបាំងការពារសុវត្ថិភាពចរាចរណ៍តាមបណ្តោយផ្លូវចន្លោះរវាងផ្លូវជាតិលេខ៤និងប្រឡាយ។
មន្រ្តីក្រុមហ៊ុន អេហ្សិត មួយរូបបានឲ្យដឹងថា ក្រុមហ៊ុនរបស់លោកបានអនុវត្តការងារនេះដោយប្រើរថយន្ត និងគ្រឿងចក្រ ហើយក៏មានការប៉ះពាល់ខ្លះដល់ផ្លូវឆ្លងកាត់ប្រឡាយចូលក្នុងបុរីពិភពថ្មីផងដែរ។
លោកបានបន្តថា បន្ទាប់ពីភាគីខាងក្រុមហ៊ុន អេហ្សិត មានការជីកប៉ះនឹងផ្លូវចេញចូលក្នុងបុរីនោះមក ខាងភាគីបុរីពិភពថ្មីបានយកគ្រឿងចក្ររបស់ខ្លួនមកចតលើច្រកផ្លូវឆ្លងកាត់ប្រឡាយ ដើម្បីរារាំងការអនុវត្តការងាររបស់ក្រុមហ៊ុន អេហ្សិត។
មន្រ្តីសមត្ថកិច្ចខណ្ឌពោធិសែនជ័យដែលឈរជើងនៅទីនោះដែលនិយាយសុំមិនបញ្ចេញឈ្មោះបានបញ្ជាក់ថា ភាពតានតឹងបានកើតឡើង ដោយមានការប្រឈមមុខដាក់គ្នាដែលនាំឲ្យអាក់ខានក្នុងការកាយនិងស្តារ ប្រឡាយចាប់ពីម៉ោង៨រហូតដល់ម៉ោងប្រមាណ១១ព្រឹក។
មន្រ្តីរូបនោះបានបញ្ជាក់ថា ក្រោយពីមានការប្រឈមមុខរវាងក្រុមហ៊ុនទាំងពីរនេះរួចមក កម្លាំងសមត្ថកិច្ចខណ្ឌជាច្រើននាក់ក៏បានចុះមកធ្វើអន្តរាគមន៏ ហើយសម្រេចដកហូតគ្រឿងចក្ររបស់ភាគីទាំងពីរយកទៅរក្សាទុកបណ្តោះអាសន្ននៅសាលាខណ្ឌ ដើម្បីរកដំណោះស្រាយ។
លោក ជួន វ៉ាន់ឌន តំណាងក្រុមហ៊ុន អេហ្សិត បានប្រាប់សារព័ត៌មាន Cambodia News ថា ក្រុមហ៊ុន អេហ្សិត បានអនុវត្តការងារនេះ ដោយសារមានតម្រូវការបីជាចម្បងគឺទី១៖ អនុលោមតាមស្មារតីអង្គប្រជុំ នាថ្ងៃទី ១៣ ខែ មីនា ឆ្នាំ២០១៥ នៅសាលារាជធានីភ្នំពេញ ដែលមានការចូលរួមដោយឯកឧត្តមអភិបាលរាជធានីភ្នំពេញ និងអាជ្ញាធរពាក់ព័ន្ធបានចូលរួម ក្នុងនោះអង្គប្រជុំបានសំណូមពរឲ្យក្រុមហ៊ុន អេហ្សិត ជួយស្តារប្រឡាយអមសងខាងផ្លូវជាតិលេខ៤ ក្នុងភូមិសាស្ត្រខណ្ឌពោធិសែនជ័យប្រវែងជាង២០គីឡូម៉ែត្រដើម្បីជួយសំរួលរំដោះទឹកកុំឲ្យជន់លិចក្នុងតំបន់ខាងលើនេះ។
លោកបានបញ្ជាក់ថា រីឯតម្រូវការទី២គឺថា ក្រុមហ៊ុន អេហ្សិត មានការព្រួយបារម្ភចំពោះសំណង់របស់បុរីពិភពថ្មី ស្ថិតនៅចំ នឹងបញ្ជរបង់ប្រាក់ជាតំបន់ដែលមានចរាចរណ៏មមាញឹកស្រាប់ ហើយនៅពេលបើកផ្លូវចេញចូលបុរី វាអាចនឹងបង្ករការកកស្ទះ និងគ្រោះថ្នាក់។
លោកបន្តថា តម្រូវការទី៣គឺ កន្លងមកក្រុមហ៊ុន អេហ្សិត បានស្នើសុំឲ្យក្រសួងសាធារណការ និងដឹកជញ្ជូន ក្រសួងដែនដីនគរូបនីយកម្ម និងសំណង់ ជួយអន្តរាគមន៍ទប់ស្កាត់ និងផ្អាកជា បណ្តោះអាសន្ន និងតម្រូវឲ្យខាងភាគីបុរីពិភពថ្មី ស្នើសុំការអនុញ្ញាតច្បាប់ពីស្ថាប័នជំនាញពាក់ព័ន្ធ ដូចជាការសាងសង់ផ្លូវចេញ-ចូលបុរីជាប់នឹងផ្លូវជាតិ គឺត្រូវសុំការអនុញ្ញាតពីសមត្ថកិច្ចគ្រប់គ្រងផ្លូវ ដោយអនុលោមតាមច្បាប់ផ្លូវថ្នល់ជាដើម។
គួរបញ្ជាក់ថា មាត្រា៣០នៃច្បាប់ផ្លូវថ្នល់ចែងថា “ដើម្បីធានាដល់ការធ្វើចរាចរណ៍លើផ្លូវជាតិ ប្រកបដោយសុវត្ថិភាព នោះរាល់សំណង់ដែលមានច្រកចេញចូលជាប់នឹងផ្លូវជាតិ ដូចជាស្ថានីយប្រេងឥន្ធនៈ ស្ថានីយហ្គាស កន្លែងលាងរថយន្ត យានដ្ឋាន ឫសំណង់ប្រហាក់ប្រហែលផ្សេងៗទៀត ដែលមានមនុស្សជួបជុំគ្នាមធ្យមត្រូវស្ថិតក្នុងចម្ងាយយ៉ាងតិច ១៥ម៉ែត្រ (ដប់ប្រាំម៉ែត្រ) ពីខ្សែបន្ទាត់ព្រំដីចំណីផ្លូវ គឺស្មើនឹង ៤៥ ម៉ែត្រពីអ័ក្សផ្លូវ។ រីឯសំណង់មជ្ឈមណ្ឌលពាណិជ្ជកម្ម ពហុកីឡាដ្ឋាន ទីលានប្រកួត រោងមហោស្រព មន្ទីរពេទ្យ គ្រឹះស្ថានសិក្សា ការរៀបចំផ្សារ ផ្សារណាត់ ….. ដែលមានមនុស្សជួបជុំគ្នាច្រើន ត្រូវស្ថិតក្នុងចម្ងាយយ៉ាងតិចបំផុត ៥០ម៉ែត្រ (ហាសិបម៉ែត្រ) ម៉ែត្រពីខ្សែបន្ទាត់ព្រំដីចំណីផ្លូវ គឺស្មើនឹង ៨០ ម៉ែត្រពីអ័ក្សផ្លូវ”។
បើតាមស្ថានភាពនៅទីតាំងនោះ ច្រកចេញចូលបុរីពិភពថ្មីជាមួយនឹងផ្លូវជាតិលេខ៤ ត្រូវស្នើសុំការអនុញ្ញាតពីក្រសួងសាធារណការ នឹងដឹកជញ្ជូន ដែលជាសមត្ថកិច្ចគ្រប់គ្រងផ្លូវ ប៉ុន្តែបុរីពិភពថ្មីត្រូវបានគេរាយការណ៍ថា មិនបានស្នើសុំការអនុញ្ញាតនៅឡើយទេ។
មន្រ្តីមួយរូបមកពីក្រសួងសាធារណការ និងដឹកជញ្ជូនបានបង្ហើបឲ្យដឹងថា អនុលោមតាមស្មារតីអង្គប្រជុំជាច្រើនលើកច្រើនសារ រួមមានទាំងថ្នាក់ដឹកនាំក្រសួងរៀបចំដែនដីនគរូបនីយកម្ម និងសំណង់ ក្រសួងសាធារណការ និងដឹកជញ្ជូន ដោយរួមទាំងតំណាងរបស់ឯកឧត្តមអភិបាលរាជធានីភ្នំពេញផង បានណែនាំឲ្យក្រុមហ៊ុនបុរីពិភពថ្មីនេះ ឲ្យសុំទៅក្រសួងសាធារណការ និងដឹកជញ្ជូន សម្រាប់ការតភ្ជាប់ផ្លូវចេញចូលបុរីជាមួយផ្លូវជាតិ។
សារព័ត៌មាន Cambodia News មិនអាចទាក់ទងអ្នកគ្រប់បុរីពិភពថ្មីនៅកំបូលដើម្បីបំភ្លឺរឿងនេះបានឡើយ ខណៈដែលបុគ្គលិកនិងកម្មកររបស់បុរីពិភពថ្មីនៅកន្លែងកើតហេតុមិនហ៊ាននិយាយប្រាប់អ្នកសារព័ត៌មាឡើយពីបញ្ហានេះ ដោយម្នាក់និយាយដូចគ្នាថា “សួរមេ”។
សារព័ត៌មាន Cambodia News នឹងបន្តតាមដានបញ្ហានេះបន្តទៀត៕
