សាលារាជធានីបញ្ចប់កិច្ចសន្យាជាមួយក្រុមហ៊ុនសំណង់ដែលសាងសង់បញ្ជរបង់ថ្លៃ
សារព័ត៌មាន Cambodia News/
ភ្នំពេញ(០២ មិថុនា ២០១៥) ៖ កាលពីម្សិលមិញ សាលារាជធានីភ្នំពេញបានលុបចោលកិច្ចសន្យាជាមួយក្រុមហ៊ុនសំណង់ក្នុងស្រុកមួយដែលកំពុងសាងសង់បញ្ជរបង់ថ្លៃពីរតាមផ្លូវលេខ២០០៤ ក្នុងខណ្ឌសែនសុខ ដើម្បីរៃអង្គាសប្រាក់សម្រាប់ការស្ថាបនា និងការជួសជុលផ្លូវដែលកំពុងតែបន្តនេះ។
សេចក្តីជូនដំណឹងរបស់សាលារាជធានីភ្នំពេញ នៅថ្ងៃទី៣១ ខែឧសភា ឆ្នាំ២០១៥ បានលើកឡើងថា អនុវត្តន៍តាមកិច្ចសន្យាវិនិយោគ BOT រវាងសាលារាជធានីភ្នំពេញ និងក្រុមហ៊ុនសឡាអិនវេសមែនគ្រុប តម្រូវឲ្យរថយន្តគ្រប់ប្រភេទ ដែលធ្វើចរាចរលើកំណាត់ផ្លូវទាំងពីរនេះ បង់ថវិកា ដើម្បីឲ្យក្រុមហ៊ុនយកទុនមកធ្វើការអភិវឌ្ឈកែលម្អ ជួលជុលនិងថែទាំ។
ដោយពិនិត្យឃើញស្ថានភាពចរាចរនៅលើកំណាត់ផ្លូវទាំងពីរកាន់តែមានភាពមមាញឹកនិងដោយបងប្អូនប្រជាពលរដ្ឋរស់នៅតាមដងផ្លូវនេះកាន់តែច្រើនកុះករ លោក ហ៊ុន សែន នាយករដ្ឋមន្ត្រីកម្ពុជា បានសម្រេចឯកភាពឲ្យសាលារាជធានីភ្នំពេញ បញ្ឈប់កិច្ចសន្យាយកកម្រៃសេវាលើរថយន្តគ្រប់ប្រភេទ ឆ្លងកាត់ផ្លូវទាំងពីរនេះ ចាប់ពីថ្ងៃទី១ខែមិថុនាឆ្នាំ២០១៥នេះតទៅ៕
