ក្រុមហ៊ុនផលិតស្រាប្រចាំអាស៊ីមិនគាំទ្រសេចក្តីព្រាងច្បាប់គ្រឿងស្រវឹងនៅកម្ពុជា
សារព័ត៌មាន Cambodia News/
ភ្នំពេញ (២៩ កក្កដា ២០១៥) ៖ សេចក្តីព្រាងច្បាប់ស្តីពី ការត្រួតពិនិត្យផលិតផលគ្រឿងស្រវឹងដែលរៀបចំដោយក្រសួងសុខាភិបាល ត្រូវបានក្រុមហ៊ុនផលិតស្រានៅតំបន់អាស៊ីមួយចំនួន បានសម្តែងនូវការមិនគាំទ្រ និងរៀបចំបញ្ជូនខ្លឹមសារមកឱ្យក្រសួងព័ត៌មាន ដើម្បីពិនិត្យមើល និងពិភាក្សា លើបញ្ហានេះ។
ការលើកឡើងនេះ បាននៅក្នុងជំនួបពិភាក្សាការងាររវាងលោកខៀវ កាញារីទ្ធ រដ្ឋមន្ត្រីក្រសួងព័ត៌មាន ជាមួយលោក Syril SAYAG តំណាងសម្ព័ន្ធក្រុមហ៊ុនផលិតស្រាប្រចាំតំបន់អាស៊ីប៉ាស៊ីហ្វិក (Asia Pacific Wines and Spirits Alliance) កាលពីព្រឹកថ្ងៃទី២៨ ខែកក្កដា ឆ្នាំ២០១៥ នៅទីស្តីការក្រសួងព័ត៌មាន។
គួរបញ្ជាក់ថា សេចក្តីព្រាងច្បាប់ស្តីពី ការត្រួតពិនិត្យផលិតផលគ្រឿងស្រវឹងដែលរៀបចំដោយក្រសួងសុខាភិបាលមាន១១ជំពូកនិង៣៩មាត្រាបានដាក់ចេញវិធានការណ៍៤ចំណុចសំខាន់ៗតាមអនុសាសន៍របស់អង្គការសុខភាពពិភពលោក គឺទី១.ការតំឡើងពន្ធលើផលិតផលគ្រឿងស្រវឹង, ទី២.ការដាក់កំរិតលើការផ្សព្វផ្សាយពាណិជ្ជកម្ម, ទី៣.ការកំណត់ជាក់លាក់លើកន្លែងលក់គ្រឿងស្រវឹង និងទី៤.ការអប់រំមហាជនព្រមទាំងកំណត់អាយុអ្នកទិញ និងអ្នកផឹក៕
