ពលរដ្ឋក្នុងក្រុងប៉ោយប៉ែតរងផលប៉ះពាល់ពីការឆេះគំនរសំរាមក្នុងខេត្ដសាកែវប្រទេសថៃ
សារព័ត៌មាន Cambodia News/
ប៉ោយប៉ែត(២១ មិនា ២០១៤)៖ គំនរសំរាមមួយកន្លែងក្នុងក្រុងអារញ្ញប្រាថេត ក្នុងខេត្ដ សាកែវ ប្រទេសថៃ បានឆាបឆេះនិងបង្កឱ្យមានផ្សែងពុលភាយចេញយ៉ាងខ្លាំងកាលពីម៉ោង ៤ទៀបភ្លឺថ្ងៃទី២០ខែមីនា។ គំនរសំរាមមួយកន្លែងនេះ ស្ថិតនៅចម្ងាយប្រមាណជា២គីឡូម៉ែត្រពីព្រំដែនកម្ពុជា។
ដោយសារតែឥទ្ធិពលនៃសារធាតុពុលមានសភាពខ្លាំងខ្លាពេក ក្រុមប្រជាពលរដ្ឋកម្ពុជា ដែលរស់នៅក្នុងទីក្រុងប៉ោយប៉ែត ដែលជាទីក្រុងមួយក្បែរព្រំដែនកម្ពុជា-ថៃ បានដាក់ពាក្យប្ដឹងទៅមន្ដ្រីអាជ្ញាធររក្សាសន្ដិសុខថៃ ដើម្បីឱ្យជួយអន្ដរាគមន៍ភ្លាមៗ។
បើតាមប្រធានមន្ដ្រីអនុរក្សថៃបានឱ្យដឹងថា ប្រជាជនកម្ពុជាដែលរស់នៅជិតប្រឡាយ ព្រំ ហូដ(Phrom Hod) ត្រូវបានរងផលប៉ះពាល់ ពីផ្សែងពុលពណ៌ស តាំងពីម៉ោង៥ទៀបភ្លឺថ្ងៃទី២០មកម្លេះ។ ក្នុងចំណោមប្រជាពលរដ្ឋទាំងអស់មានអ្នកខ្លះមានបញ្ហាភ្នែក និងអ្នកខ្លះទៀតមានបញ្ហាប្រព័ន្ធដង្ហើម។
ជាការ ឆ្លើយតបក្រោយពេលដែលសំរាមបានឆេះ អភិបាលក្រុងអារញ្ញប្រាថេត ក៏បានបញ្ជាឱ្យបញ្ជូនឡានពន្លត់អគ្គីភ័យពីរគ្រឿង ចុះទៅអន្ដរាគមន៍នៅទីតាំងកើតហេតុ បន្ទាប់មកផ្សែងក៏បានថយចុះជាងមុនបន្ដិច។ ពាក់ព័ន្ធនឹងការឆេះនេះដែរ ក្រុមអាជ្ញាធរជឿជាក់ថា អាចបណ្ដាលមកពីកំដៅខ្លាំងជាមួយនឹងប្រតិកម្មនៃប្រភេទកាក សំណល់ផ្សេងៗដែលបានបោះចោល៕
