លោក ហ៊ុន សែន អំពាវនាវឲ្យរក្សាទឹកទុកសម្រាប់ស្រូវវស្សា និងស្រូវប្រាំង
សារព័ត៌មាន Cambodia News/
ភ្នំពេញ (០៥ តុលា ២០១៥) ៖ លោកនាយករដ្ឋមន្ត្រី ហ៊ុន សែន បានសម្តែងការព្រួយបារម្ភ តាមរយៈទំព័រហ្វេសប៊ុករបស់ខ្លួនថា ដោយសារតែភ្លៀងធ្លាក់តិចតួច បានធ្វើឲ្យប៉ះពាល់ ដល់ការធ្វើស្រែប្រាំង របស់ប្រជាពលរដ្ឋ។ លោក ហ៊ុន សែន បានបន្តថា ទឹកទន្លេមេគង្គ ទន្លេសាប និងទន្លេបាសាក់ នៅមានកម្រិតទាប មិនអាចហូរចូលព្រែក ឬអាង សម្រាប់ឱ្យប្រជាពលរដ្ឋ ធ្វើស្រែប្រដេញទឹក ឬវស្រែប្រាំង បានគ្រប់គ្រាន់។
លោក ហ៊ុន សែន បានលើកឡើងថា នៅឆ្នាំនេះ ភ្លៀងធ្លាក់ពីដើមរដូវវស្សាតិច ធ្វើឱ្យការបង្កបង្កើនផល របស់ប្រជាកសិករ នៅតំបន់មួយចំនួន ជួបការលំបាកយឺតយ៉ាវ និងរងផលប៉ះពាល់។
បើតាមលោក ហ៊ុន សែន ទន្ទឹមនឹងការចូលរួម ពិធីកាន់បិណ្ឌ នៅក្នុងរដូវបុណ្យភ្ជុំនេះ សូមបបងប្អូន ប្រជាកសិករ យកចិត្តទុកដាក់ផងដែរ ក្នុងការថែរក្សា ដំណាំកសិកម្ម ជាពិសេសគឺសន្ទូង។
លោក ហ៊ុន សែន ក៏បានអំពាវនាវ ឱ្យប្រជាពលរដ្ឋ ឆ្លៀតក្រៅតែពីការធ្វើបុណ្យ ពេលអំឡុងភ្ជុំបិណ្ឌ ត្រូវខិតខំរក្សាទឹកទុក ក្នុងស្រែ ក្នុងអាង ក្នុងប្រឡាយ ដើម្បីការលូតលាស់ នៃស្រូវវស្សាផង និងសម្រាប់ ការចាប់ផ្តើមស្រូវប្រាំងផង៕
