រដ្ឋាភិបាលតម្រូវឲ្យមណ្ឌលថែទាំកុមារត្រូវសុំច្បាប់ និងបំពេញតាមស្តង់ដារ
សារព័ត៌មាន Cambodia News/
ភ្នំពេញ (៦ តុលា ២០១៥) ៖ រដ្ឋាភិបាលតម្រូវឲ្យមណ្ឌលថែទាំកុមារត្រូវតែសុំច្បាប់អនុញ្ញាតពីក្រសួងសង្គមកិច្ចអតីតយុទ្ធជន និងយុវនីតិសម្បទាជាមួយនឹងការព្រមានចាត់វិធានការតាមច្បាប់ក្នុងករណីលួចលាក់ខណៈដែលគេរកឃើញថាមានមណ្ឌលរាប់រយត្រូវបានបង្កើតឡើងគ្រាន់តែជាមុខរបរដើម្បីរកលុយពីម្ចាស់ជំនួយ។
បញ្ញតិ្តមួយដែលចែងនៅក្នុងអនុក្រឹត្យដែលចេញកាលពីខែកញ្ញាបានកំណត់ឲ្យមណ្ឌលគ្មានច្បាប់ត្រូវចុះឈ្មោះក្នុងរយៈពេល ៦ ខែ។
អនុក្រឹត្យ «ស្តីពីការគ្រប់គ្រងមណ្ឌលថែទាំកុមារ» ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ១១ ខែកញ្ញាមាន ៩ ជំពូក និង ២០ មាត្រាគឺចែងពីសមត្ថកិច្ចគ្រប់គ្រងការអនុញ្ញាតឲ្យដំណើរការមណ្ឌលកាតព្វកិច្ចមណ្ឌលប្រភេទកុមារដែលមានសិទ្ធិស្នាក់នៅមណ្ឌល ឬបញ្ឈប់ការស្នាក់នៅការដោះស្រាយវិវាទ និងទណ្ឌកម្មជាដើម។
អនុក្រឹត្យនេះបង្ហាញថាកុមារដែលអនុញ្ញាតឲ្យរស់នៅក្នុងមណ្ឌលថែទាំកុមារបានជាកុមារដែលគ្មានឪពុកម្តាយ ឬអាណាព្យាបាលដែលអាចរស់នៅជាមួយបាន ជាកុមារបែកពីគ្រួសារដោយសារការបោះបង់ កុមារមានឪពុកម្តាយជាប់ពន្ធនាគារ ការជួញដូរ ឬចំណាកស្រុកកុមារបែកពីគ្រួសារដោយស្ថានភាពគំរាមកំហែងរងអំពើហិង្សា រងការរំលោភផ្លូវកាយ ឬផ្លូវភេទ ការកេងប្រវ័ញ្ចគ្រប់រូបភាព។
អនុក្រឹត្យនេះក៏តម្រូវឲ្យមណ្ឌលថែទាំកុមារមានសិទ្ធិបញ្ឈប់កុមារឲ្យរស់នៅក្នុងមណ្ឌលដោយការ «ធ្វើសមាហរណកម្មទៅក្នុងសហគមន៍វិញ» ក្នុងករណីមានម្តាយ ឪពុកចិញ្ចឹម ពួកគេមានលទ្ធភាពរកការងារបានធ្វើជាដើម។
កន្លងមកមានករណីរំលោភបំពានតាមមណ្ឌលកុមារដែលអនុក្រឹត្យបានតម្រូវឲ្យក្រសួងសង្គមកិច្ច «ធ្វើអធិការកិច្ចជាបន្ទាន់ក្នុងរយៈពេលមិនលើសពី ៤៨ ម៉ោង» ដើម្បីដោះស្រាយបាតុភាពទាំងនោះ។ «មណ្ឌលថែទាំកុមារដែលគ្មានការអនុញ្ញាតពីក្រសួងសង្គមកិច្ចត្រូវចាត់ទុកជាមណ្ឌលលួចលាក់ និងត្រូវទទួលទោសតាមច្បាប់ជាធរមាន» ហើយក្នុងករណីមិនគោរពតាមបញ្ញត្តិចែងក្នុងអនុក្រឹត្យនឹងត្រូវ «ព្រមានជាលាយលក្ខណ៍អក្សរ ផ្អាកសកម្មភាពបណ្តោះអាសន្ន ដកហូតលិខិតអនុញ្ញាតជាស្ថាពរ»៕
