រដ្ឋមន្ត្រីក្រសួងសុខាភិបាល ជំរុញប្រជាពលរដ្ឋ ប្តឹងទៅអាជ្ញាធរ លើករណីមានការលក់ឱសថក្លែងក្លាយ
សារព័ត៌មាន Cambodia News/
ភ្នំពេញ (០៧ តុលា ២០១៥) ៖ នៅក្នុងពិធីដុតកម្ទេចឱសថក្លែងក្លាយប្រមាណ៣០លានគ្រាប់ នៅសង្កាត់ជើងឯក រាជធានីភ្នំពេញ ព្រឹកថ្ងៃទី៥ ខែតុលា លោកវេជ្ជបណ្ឌិត ម៉ម ប៊ុនហេង ថ្លែងថា កន្លែងលក់ឱសថមិនមែនជាកន្លែងផ្សំថ្នាំព្យាបាលជំងឺនោះទេ ពោលគឺមានតែគ្រូពេទ្យនោះទេដែលមានសិទ្ធចេញវេជ្ជបញ្ជាផ្សំថ្នាំពេទ្យឲ្យអ្នកជំងឺទៅទិញឱសថតាមឱសថដ្ឋានដើម្បីព្យាបាលជំងឺ។
លោកវេជ្ជបណ្ឌិត ម៉ម ប៊ុនហេង ក៏បានប្រកាសដោយបើកចំហដោយជំរុញឲ្យប្រជាពលរដ្ឋគ្រប់រូបត្រូវធ្វើការប្តឹងទៅអាជ្ញាធរដែលនៅជិតខ្លួន ប្រសិនបើរកឃើញថា មានអ្នកលក់ថ្នាំពេទ្យ ឬឱសថស្ថាន បានធ្វើការសកម្មភាពផ្សំថ្នាំព្យាបាលជំងឺ និងចែកចាយឱសថក្លែងជូនឲ្យប្រជាពលរដ្ឋដើម្បីព្យាបាលជំងឺ។
ជាមួយគ្នានោះ លោក អង្គវង្ស វឌ្ឍានា រដ្ឋមន្ត្រីក្រសួងយុត្តិធម៌ បញ្ជាក់ថា ដាក់ទោសទណ្ឌចំពោះជនល្មើសលក់ចែកចាយឱសថក្លែងក្លាយ គឺនៅភាពតិចតួច ពោលគឺតាមមាត្រា១២ថ្មី ច្បាប់ស្តីពីគ្រប់គ្រងឱសថ គឺជនល្មើសត្រូវជាប់ពន្ធនាគារពី៥ទៅ១០ ឆ្នាំ និងមានពិន័យជាប្រាក់ពី២០លានទៅ៥០លានរៀល៕
