សម្តេចតេជោ ៖ ប្រជាពលរដ្ឋច្រើនលើសលប់បំផុតគាំទ្រសន្តិភាព និងការអភិវឌ្ឍន៍
សារព័ត៌មាន Cambodia News/
ភ្នំពេញ (០៨ មិថុនា ២០១៧) ៖ នៅលើទំព័រហ្វេសប៊ុក របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជា នាព្រឹកថ្ងៃទី០៨ ខែមិថុនា ឆ្នាំ២០១៧នេះបានលើកឡើងថា“លទ្ឋផលបឋមនៃការបោះឆ្នោតគឺបានបញ្ជាក់ច្បាស់ថា ពលរដ្ឋកម្ពុជាភាគច្រើនលើសលប់បំផុតគាំទ្រសន្តិភាព និងការអភិវឌ្ឍន៍ក្រោមការដឹកនាំរបស់ សម្តេចតេជោ ហ៊ុន សែន”។
ជាមួយគ្នានេះ សម្តេចតេជោ ហ៊ុន សែន ក៏បានអរគុណសារជាថ្មីដល់ប្រជាពលរដ្ឋទូទាំងប្រទេសដែលនៅតែជឿជាក់និងបានបោះឆ្នោតគាំទ្រគណបក្សប្រជាជនកម្ពុជា តាំងពីអាណត្តិមុនៗមកទល់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤នេះ។
សូមបញ្ជាក់ថា លទ្ធផលបឋមក្រៅផ្លូវការដែលទទួលបានពីប្រភពនានា បានបង្ហាញថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ ដែលបានធ្វើឡើងកាលពីថ្ងៃទី០៤ ខែមិថុនា កន្លងទៅនេះគណបក្សប្រជាជនកម្ពុជាទទួលបានជ័យជម្នះគ្រប់គ្រងឃុំ-សង្កាត់ជាង១ពាន់ឃុំ-សង្កាត់ ខណៈគណបក្សសង្គ្រោះជាតិគ្រប់គ្រងជិត ៥០០ឃុំ-សង្កាត់៕
