រដូវប្រាំងនាឆ្នាំក្រោយកម្ពុជាអាចទទួលរងនូវ ការប្រែប្រួលអាកាសធាតុខ្លាំង
សារព័ត៌មាន Cambodia News/
ភ្នំពេញ (២៤ វិច្ចិកា ២០១៥) ៖ តាមសេចក្តីប្រកាសរបស់ក្រសួងធនធានទឹក និងឧតុនិយមបានឲ្យដឹងថា ឆ្នាំ២០១៦ ខាងមុខនេះ កម្ពុជាអាចទទួលរងនូវ ការប្រែប្រួលអាកាសធាតុខ្លាំង ដោយរដូវប្រាំង ពិសេសក្នុងខែមេសា និងឧសភា អាកាសធាតុ នឹងមានភាពក្តៅហួតហែង សីតុណ្ហភាពអតិបរមា នឹងកើនដល់៤០-៤១អង្សារសេ ហើយរដូវវស្សាវិញ អាចនឹងមកយឺត ហើយនៅដើមរដូវមានភ្លៀងធ្លាក់តិច។
ការព្យាករណ៍នេះ ត្រូវបាន ក្រសួងធនធានទឹក និងឧតុនិយម ប្រកាសថា ធ្វើឡើងក្រោយពី តាមដាន ទៅលើកម្រិតសីតុណ្ហភាព នៅលើផ្ទៃសមុទ្រប៉ាស៊ីហ្វិកភាគខាងលិច និងផ្ទៃសមុទ្រចិនខាងត្បូង ដែលការ ប្រែប្រួលសីតុណ្ហភាព នៅតំបន់ទាំងពីនេះ មានឥទ្ធិពលខ្លាំង មកលើស្ថានភាពអាកាស ធាតុប្រទេសកម្ពុជា។
ជាមួយគ្នានេះក្រសួងធនធានទឹក និងឧតុនិយម បានអំពាវនាវដល់ ក្រសួង ស្ថាប័នពាក់ព័ន្ធ អាជ្ញាធរដែនដី និងប្រជាពលរដ្ឋ ឲ្យចូលរួមថែរក្សាទឹកទុកឲ្យបានល្អ សម្រាប់បម្រើដល់ការប្រើប្រាស់ ប្រចាំថ្ងៃ ក៏ដូចជាសម្រាប់វិស័យកសិកម្ម៕
