ក្រសួងមហាផ្ទៃ បន្ថែមមន្រ្ដីនគរបាលធ្វើការត្រួតពិនិត្យយានយន្ដបើកបរលើសល្បឿនកំណត់
សារព័ត៌មាន Cambodia News/
ភ្នំពេញ (០៨ កុម្ភៈ ២០១៦) ៖ មន្រ្ដីក្រសួងមហាផ្ទៃបានប្រកាសថា ក្រសួងនឹងបង្កើនបរិមាណមន្ត្រីនគរបាលចរាចរណ៍លើជំនាញវាស់ស្ទង់ ល្បឿនយានយន្តដែលបើកបរលើសល្បឿនកំណត់ ដើម្បីពង្រឹងការគោរពច្បាប់ចរាចរណ៍ផ្លូវគោកថ្មី។
កាលពីចុងសប្ដាហ៍នេះក្រសួងមហាផ្ទៃ បានកោះប្រជុំមន្រ្ដីនគរបាលចរាចរណ៍មកពីគ្រប់ខេត្ត រាជ ធានីទូទាំងប្រទេស ដើម្បីមកទទួលជំនាញការប្រើប្រាស់ឧបករណ៍វាស់ស្ទង់ល្បឿន និងវាស់ជាតិស្រវឹង ក្នុងកិច្ចប្រឹងប្រែងបង្កើនបរិមាណប៉ុស្តិ៍ត្រួតពិនិត្យជាតិអាល់កុល និងរថយន្តលើ្មសច្បាប់ឱ្យកាន់តែច្រើនកន្លែងនិងគ្រប់ផ្លូវជាតិសំខាន់ៗ នៅទូទាំងប្រទេស។
សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃធ្លាប់មានប្រសាសន៍លើកឡើងថា ការពង្រីកកម្លាំងត្រួតពិនិត្យសុវត្ថិភាពចរាចរណ៍ទាំងល្បឿន និងជាតិស្រវឹងនេះ ជាមធ្យោ បាយចំពោះមុខ ដើម្បីដោះស្រាយចំពោះបុគ្គលដែលបើកបរមិនគោរពច្បាប់ ខណៈគ្រោះថ្នាក់ ចរាចរណ៍ដែលបានកើតឡើងដោយកត្តាការបើកបរលើសល្បឿនកំណត់មានរហូតដល់ ជាង៤០ភាគរយ និងការបើក បរក្រោមឥទ្ធិពលនៃជាតិស្រវឹងមាន១១ភាគរយ។
ជាមួយគ្នានេះ សម្តេចក្រឡាហោមក៏បានអះអាងថា នាពេលដ៏ខ្លីខាងមុខនេះ ក្រសួងនឹងបង្កើនការ បំពាក់ឧបករណ៍ត្រួតពិនិត្យស្វ័យប្រវត្តិ និងកាមេរ៉ាសុវត្ថិភាពទំនើបៗនៅតាមផ្លូវជាតិសំខាន់ៗបន្ថែមទៀត ដើម្បីត្រួតពិនិត្យ២៤ម៉ោង លើ២៤ម៉ោង ដែលជាការអនុវត្តច្បាប់គ្រប់ជ្រុងជ្រោយ មិនចាំបាច់ប្រើកម្លាំងនគរបាលពួនស្ទាក់ និងឈរវាស់ស្ទង់ល្បឿនទៀតឡើយ៕
