ខ្សែភាពយន្ដរបស់ Angelina Jolie ធ្វើឲ្យក្រុងបាត់ដំបងវិលទៅរកសម័យអតីតកាល
សារព័ត៌មាន Cambodia News/
ភ្នំពេញ (០៩ កុម្ភៈ ២០១៦) ៖ លោកស្រី Angelina Jolie តារាភាពយន្ដ Hollywood អាមេរិក កំពុងដឹកនាំរឿងនៅខេត្តបាត់ដំបង ដែលជាខ្សែភាពយន្ដឯកសារស្ដីពីប្រវត្តិសាស្រ្តសម័យខ្មែរក្រហម ហើយការដឹកនាំរឿងនេះ ត្រូវបានសម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាចាត់ទុកការថតរឿងនេះថា ពិតជាមានសារៈប្រយោជន៍ដល់ការយល់ដឹងបន្ថែមអមបិជីវិតរស់នៅពិត ក្នុងរបបវាលពិឃាត (១៩៧៥-១៩៧៩)។
សម្ដេច តេជោ ហ៊ុន សែន បានសរសេរនៅលើ Page របស់ខ្លួនឲ្យដឹងថា ការចូលរួមផលិតខ្សែភាពយន្តឯកសារស្តីពីប្រវត្តិជីវិតក្នុង ប្រល័យពូជសាសន៍របប ប៉ុលពត (១៩៧៥-១៩៧៩) ដែលកំពុងរៀបចំដោយ លោកស្រី Angelina Jolie តារាភាពយន្ត Hollywood អាមេរិក គឺពិតជាមានសារៈប្រយោជន៍ដល់ការយល់ដឹងបន្ថែមអំពីជីវិតតស៊ូរស់នៅពិត ក្នុងរបបវាលពិឃាត។
ដោយសារសង្គ្រាម និងការកាប់សម្លាប់ ការបង្ខំធ្វើការលើសកម្លាំង ការបង្អត់អាហារនៅក្រោមការដឹកនាំរបស់ ប៉ុល ពត ទើបធ្វើអោយពលរដ្ឋខ្មែរជាច្រើនលាននាក់ត្រូវបានស្លាប់យ៉ាង អាណោចអាធម្មក្នុងរយៈពេល ៣ ឆ្នាំ ៨ ខែ២០ ថ្ងៃ។ យុវជនខ្មែរដែលកើតមិនទាន់មួយចំនួនគឺមិនប្រាកដជាមិនជឿថាខ្មែរយើង មានរបបបែបនេះកើតមាននៅលើទឹកដីកម្ពុជា។ អ្វីដែលកើតឡើងនៅពេលនោះ គឺយើងមិនអោយកើតឡើងជាបន្តទៀតនៅលើទឹកដីកម្ពុជាក៏ដូចជានៅតាមបណ្តា ប្រទេសផ្សេងៗទៀត។
ប្រទេសជាតិយើងនៅពេលនេះគឺកំពុងបោះជំហាន ឆ្ពោះទៅមុខក្រោមម្លប់ សន្តិភាព និងក្រោមការដឹកនាំប្រកបដោយគតិបណ្ឌិត សម្តេចតេជោ ហ៊ុន សែន ដែលជាទីសង្ឃឹមរបស់កម្ពុជាទាំងមូល។ យើងរួមគ្នាថែរក្សា ការពារសន្តិភាព ដើម្បីកម្ពុជាកាន់តែរីកចម្រើនលូតលាស់ខ្ពស់ត្រដែតទៅមុខជានិច្ច។ សន្តិភាព បានផ្តល់ឱកាសដល់បរទេសមកកំសាន្ត មកប្រកបអាជីវកម្ម និង មកផលិតខ្សែភាពយន្តនៅក្នុងប្រទេសយើងដូចជាតារាហូលីវូដនេះជាដើម៕
