សន្និសីទថ្នាក់ជាតិលើកទី៣ ស្ដីអំពីសមភាពយេនឌ័រនៅកម្ពុជា
សារព័ត៌មាន Cambodia News/
ដោយ៖ ហេង នាង/
ភ្នំពេញ (១១ កុម្ភៈ ២០១៦) ៖ នៅថ្ងៃទី១១ ខែកុម្ភៈ នេះ អង្គការវិទ្យាស្ថានបើកទូលាយ និងអង្គការ UN Women ប្រចាំនៅប្រទេសកម្ពុជា បានរៀបចំសន្និសីទថ្នាក់ជាតិលើកទី៣ នៅសណ្ឋាគារ កាំបូឌីយ៉ាណា ស្ដីពីគោលដៅអភិវឌ្ឍន៍ប្រកបដោយចីរភាពដំណើរការសម្រាប់ស្ត្រី និងក្មេងស្រីនៅប្រទេសកម្ពុជា ដែលមានការចូលរួមពីតំណាងស្ថាប័នរដ្ឋាភិបាល អង្គការ UN Women អង្គការវិទ្យាស្ថានបើកទូលាយ និងបណ្តាញសារព័ត៌មានដែលមកពីស្ថាប័នផ្សេងៗ។
ថ្លែងនៅក្នុងសន្និសីទថ្នាក់ជាតិស្តីពីស្ត្រីលើកទី៣ លោកស្រី ជឹម ណាវី នាយិកាប្រតិបត្តិអង្គការវិទ្យាស្ថានបើកទូលាយ បានមានប្រសាសន៍ថា ដើម្បីធានាឲ្យមាននិរន្តរភាពនៃសមភាពយេនឌ័រនៅកម្ពុជា ដោយការចូលរួមសកម្មភាពពីសំណាក់ស្ថាប័នរដ្ឋាភិបាល និងអង្គការសង្គមស៊ីវិលគឺជាការចាំបាច់យ៉ាងខ្លាំក្នុងការ អភិវឌ្ឍន៍សង្គម និងចូលរួមក្នុងការបំពេញនូវផ្នែកចន្លោះប្រយោងក្នុងការ អនុវត្តន៍សមភាពយេនឌ័រនៅកម្ពុជា។
ជាមួយគ្នានោះលោកស្រី ជឹម ណាវី បានអំពាវនាវដល់អង្គការសង្គមស៊ីវិលនៅកម្ពុជាឲ្យមានការ ប្តេចជ្ញាចិត្តក្នុងការធានាឲ្យមានភាពរីកចម្រើនទៅមុខនៅក្នុងការ អនុវត្តគោលដៅអភិវឌ្ឍន៍ប្រកបដោយចីរភាព ជាពិសេសគឺធានាថា រាល់ទិដ្ឋភាពសមភាពយេនឌ័រនឹងត្រូវបានបញ្ជ្រាបនៅក្នុងបរិបទកម្ពុជា ដើម្បីធ្វើឲ្យគោលដៅអភិវឌ្ឍន៍ប្រកបដោយចីរភាព និងគោលដៅទី៥ស្តីពីការសម្រេចឲ្យបានបានសមភាពយេនឌ័រ និងការពង្រឹងភាពអង់អាចដល់ស្ត្រី និងកុមារីគ្រប់រូបនៅក្នុងប្រទេសកម្ពុជា។
ថ្លែងនៅក្នុង ពិធីបើកសន្និសីទថ្នាក់ជាតិស្តីពីស្ត្រីលើកទី៣នេះ លោកជំទាវ គឹម ស៊ីផាន់ អគ្គនាយកនៃអគ្គនាយកដ្ឋានសមភាពយេនឌ័រ និងការអភិវឌ្ឍន៍នៃក្រសួងកិច្ចការនារីបានមានប្រសាសន៍ថា រាជរដ្ឋាភិបាលមានការប្តេចជ្ញាចិត្តខ្ពស់ក្នុងការជំរុញ និងអនុវត្តគោលនយោបាយសមភាពយេនឌ័រ និងបង្កើតភាពអង់អាចដល់ស្ត្រី ដែលចាប់ទុក ស្ត្រីជាឆ្អឹងខ្នងនៃសេដ្ឋកិច្ច និងសង្គមជាតិ។
លោក ជំទាវ គឹម ស៊ីផាន់ បានបន្តថា ផ្អែកតាមរបាយការណ៍ស្ត្រីពីការសម្រេចបានគោលដៅ អភិវឌ្ឍន៍សហស្សវត្សរ៍កម្ពុជាក្នុងឆ្នាំ២០១៣ ដល់ឆ្នាំ២០១៥ សម្រេចបានចំណុចដៅជាច្រើនតាមរយៈការប្តេចជ្ញាចិត្តរបស់រដ្ឋាភិបាល និងកិច្ចសហការជិតស្និទ្ធជាមួយថៃគួអភិវឌ្ឍន៍ ជាពិសេសគោលដៅទី៣ លើកកម្ពស់សមភាពយេនឌ័រ និងការបង្កើនភាពអង់អាចដល់ស្ត្រីសម្រេចបានលទ្ធផលគួរឲ្យកត់ សម្គាល់។
គួរបញ្ជាក់ថា សន្និសីទថ្នាក់ជាតិស្តីពីស្ត្រីលើកទី៣ ស្ដីពីគោលដៅអភិវឌ្ឍន៍ប្រកបដោយចីរភាពដំណើរការសម្រាប់ស្ត្រី និងកុមារីនៅកម្ពុជា រៀបចំក្នុងគោលចំណងផ្តល់នូវទម្រង់សកម្មភាពថ្នាក់ជាតិមួយសម្រាប់ ជំរុញឲ្យមានសកម្មភាពយេនឌ័រ និងការពង្រឹងភាពអង់អាចដល់ស្ត្រីដល់ស្ត្រីគ្រប់រូប និងកុមារីគ្រប់រូបឲ្យស្របតាមអាទិភាពថ្នាក់ជាតិសំខាន់ៗដូចដែល មានចែងក្នុងនារីរតនៈទី៤ និងក្នុងគោលដៅអភិវឌ្ឍន៍ប្រកបដោយចីរភាព សម្រាប់ការអភិវឌ្ឍន៍ជាអន្តរជាតិនៅក្នុងឆ្នាំ២០១៥ ដល់ឆ្នាំ២០៣០៕
