សម្តេចហ៊ុន សែនសរសើរលោកឆាយ សុផល ដែលចងក្រងសៀវភៅដ៏មានសារៈសំខាន់
សារព័ត៌មាន Cambodia News/
ដោយ៖ ហេង នាង/
ភ្នំពេញ (១១ កុម្ភៈ ២០១៦) ៖ សម្តេចហ៊ុន សែន នាយករដ្ឋមន្ត្រីនៃកម្ពុជា បានកោតសរសើរ លោកឆាយ សុផល អ្នកកាសែតជើងចាស់ដ៏ល្បីមួយរូបនៅកម្ពុជា និងជាអ្នកនិពន្ធ ដែលបានខិតខំស្រាវជ្រាវចងក្រងសៀវភៅដ៏មានសារៈសំខាន់សម្រាប់កូនចៅ ជំនាន់ក្រោយបានសិក្សាស្រាវជ្រាវ។
នៅក្នុងលិខិត សម្តេច ហ៊ុន សែន បានសរសេរថា៖ “ឆ្លៀតឱកាសនេះ ខ្ញុំសូមថ្លែងនូវការកោតសរសើរដោយស្មោះចំពោះលោកដែលបានខិតខំ ស្រាវជ្រាវចងក្រងសៀវភៅដ៏មានសារៈសំខាន់នេះឡើងទុកជាឯក សារសម្រាប់កូនចៅជំនាន់ក្រោយបានសិក្សាស្រាវជ្រាវ”។
លិខិតសរសើររបស់សម្តេចហ៊ុន សែន បានធ្វើឡើងក្រោយពីលោកឆាយ សុផល បានផ្ញើសៀវភៅទៅកាន់សម្តេចចំនួន១០ក្បាល ដែលសៀវភៅនោះមានចំនងជើងថា សត្រូវមិត្តភក្តិឯង ផែនដី និងផែនទីកម្ពុជា-វៀតណាម ។
គួរបញ្ជាក់ថា រហូតមកដល់បច្ចុប្បន្ននេះ លោក ឆាយ សុផល បានបោះពុម្ពផ្សាយសៀវភៅដែលលោកបានចងក្រង មិនតិចជាង៦ក្បាលនោះទេ ក្នុងនោះមានសៀវភៅនិយាយពីនាយករដ្ឋមន្រ្តីខ្មែរនិងព្រះមហាក្សត្រជាដើម។ នៅពេលខាងមុខឆាប់ៗនេះ លោកនឹងចេញផ្សាយសៀវភៅមួយក្បាលយទៀតមានចំណងជើងថា”ហ៊ុន សែន នយោបាយនិងអំណាចក្នុងប្រវត្តិសាស្រ្តខ្មែរជាង៤០ឆ្នាំ”៕
