លោក កឹម សុខា បដិសេធទាំងស្រុងរឿងលោកមានប្រពន្ធចុង
Cambodia News
ភ្នំពេញ៖ នៅក្នុងសន្និសីទសារព័ត៌មាន នៅព្រឹកថ្ងៃពុធនេះ លោក កឹម សុខា ប្រធានស្តីទីគណបក្សសង្គ្រោះជាតិ បានមានប្រសាសន៍ថា លោកមិនស្គាល់ស្ត្រីដែលចេញមកអះអាងថា ជាភរិយាចុងរបស់លោកនោះទេ និងថាវាជាឆាកនយោបាយ ដែលរៀបចំដោយគណបក្សកាន់អំណាចតែប៉ុណ្ណោះ។
លោក កឹម សុខា បន្តថា « ខ្ញុំសុំបដិសេធទាំងស្រុង ខ្ញុំគ្មានប្រព្រឹត្តអំពើថោកទាប ដូចអ្វីដែលគេរៀបចំឆាក ហើយយើងដឹងហើយថា អ្នកណាអ្នករៀបនោះ យើងដឹងគ្រប់គ្នាហើយ ទូរទស្សន៍អ្នកណា វិទ្យុអ្នកណា នរណាអ្នកនាំធ្វើ? ប្រសិនជាយើងទាំងអស់គ្នាដឹងហើយ នេះហើយជារឿងនយោបាយ»។
ចំណែកអ្នកស្រី កែវ សុផាន់ណារី ដែលអះអាងថា ជាប្រពន្ធចុងរបស់លោក កឹម សុខា បានតវ៉ានៅ មុខទីស្នាក់ការរបស់គណបក្សសង្គ្រោះជាតិនៅថ្ងៃពុធនេះ ដោយស្រែកទាមទារឲ្យលោក កឹម សុខា ចេញជួយចិញ្ចឹមគាត់ និងកូន២នាក់។
គួររំលឹកដែរថា អ្នកស្រី កែវ សុផាន់ណារី និងម្តាយ បានចេញមុខអះអាងជាភរិយាចុងរបស់លោក កឹម សុខា តាំងពីថ្ងៃទី០៩ ខែមិថុនា ខណៈពេលអ្នកស្រីចូលរួមបាតុកម្ម ជាមួយលោក ជុំ ម៉ី ប្រឆាំងនឹងលោក កឹម សុខា។
ប៉ុន្តែចំពោះបញ្ហានេះ ត្រូវបានអ្នកវិភាគចាត់ទុកថា វាជារឿងរបស់បុគ្គល មិនគួរអ្នកនយោបាយលើកមកវាយប្រហារគ្នា ដើម្បីទាក់ទាញសន្លឹកឆ្នោតពីពលរដ្ឋនោះទេ៕