ផ្សែងបំពុលបរិយាកាសដេញភ្ញៀវទេសចរ
ចំនួនអ្នកទេសចរដែលទៅទស្សនាក្រុង ប៉េកាំងបានធ្លាក់ចុះគួរឲ្យកត់សំគាល់ នៅក្នុងឆមាសទីមួយ ឆ្នាំ ២០១៣។ នេះបើតាមការចុះផ្សាយរបស់កាសែតក្នុងស្រុកចិន China Daily។ ផ្សែងបំពុលបរិយាកាលក្នុងរដ្ឋធានី គឺជាមូលហេតុចំបងដែលធ្វើឲ្យចំនួនអ្នកទេសចរថយចុះ។
នៅរយៈពេល៦ខែដើមឆ្នាំនេះ រដ្ឋធានីប៉េកាំងបានទទួលអ្នកទេសចរប្រមាណតែ ជាង ២លាននាក់ គឺធ្លាក់ចុះ ១៤,៣ភាគរយ បើប្រៀបធៀបនឹងរយៈពេលដូចគ្នា កាលពីឆ្នាំទៅ។ យោងតាមអ្នកទទួលខុសត្រូវទេសចរណ៍ចិន វិបត្តិសេដ្ឋកិច្ចសកល អាចជាមូលហេតុមួយដែលធ្វើឲ្យចំនួនអ្នកទេសចរមកក្នុងរដ្ឋធានី ប៉េកាំងធ្លាក់ចុះ។ ប៉ុន្តែ មើលទៅ ប្រហែលជារូបភាព ដែលបង្ហាញពីរាជវាំងហាមឃាត់ ឬCité Interdite រុំព័ទ្ធដោយផ្សែងពុលក្រាស់ឃ្មឹក ដែលបានបំបាក់ទឹកចិត្តអ្នកទេសចរមិនឲ្យចូលទៅទស្សនារដ្ឋធានី ប៉េកំាង។
ដោយសារតែលទ្ធផលមិនល្អ អាជ្ញាធរចិនបានចាត់វិធានការ តាំងពីការធ្វើច្បាប់ដើម្បីដាក់ពិន័យដល់អ្នកបំពុលបរិស្ថាន និងបានជួយសម្រួលក្រដាសស្នាមជាច្រើនដល់អ្នកទេសចរ។ ឧទាហរណ៍ ចាប់តាំងពីខែមករាដើមឆ្នាំ អ្នកដែលធ្វើដំណើរឆ្លងកាត់ទីក្រុងប៉េកាំង ត្រូវអាជ្ញាធរចិនអនុញ្ញាតឲ្យចូលទស្សនាក្នុងប្រទេសចិន រយៈពេល ៧២ម៉ោង គឺបីថ្ងៃ ដោយមិនចាំបាច់សុំទិដ្ឋាការ។ រហូតមកដល់ពេលនេះ វិធានការនេះមិនបានធ្វើឲ្យចំនួនអ្នកទេសចរកើនឡើងវិញទេ។ បច្ចុប្បន្ននេះ អាជ្ញាធរចិនលេងសន្លឹកបៀមួយទៀត គឺបញ្ចុះតម្លៃសំបុត្រយន្តហោះ ដើម្បីលើកទឹកចិត្តភ្ញៀវឲ្យចូលទៅទស្សនា និងបំភ្លេចផ្សែងពុលក្នុងទីក្រុងប៉េកាំង។
សូមរំលឹកថា កាលពីខែមករាកន្លងទៅ តំបន់ភាគខាងជើង និងខាងកើតចិនទទួលរងគ្របដណ្តប់ដោយផ្សែងពុលដែលមានប្រភពចេញមកពី រោងចក្រឧស្សាហកម្មប្រើធ្បូងថ្ម និងពីរថយន្តរាប់លានគ្រឿងក្នុងប្រទេសចិន។ គួរដឹងថា ផ្សែងពុលដែលជាធាតុល្អិតឆ្មារ និងជាភ្នាក់ងារបង្កជម្ងឺរលាកផ្លូវដង្ហើម បានសម្លាប់មនុស្សប្រមាណ ៨ពាន់នាក់ និងបណ្តាលឲ្យមនុស្សស្លាប់មុនអាយុ ប្រមាណជាង ១លាន២សែននាក់៕ដោយ ឈាង បុប្ផា (RFI)